قازاقستاندىقتار قوسىمشالاردى قولدانباي-اق Wi-Fi ارقىلى قوڭىراۋ شالا الادى
استانا. KAZINFORM - مەملەكەتتىك مەكەمەلەردە بازالىق بايلانىس ستانسيالارىن ورناتۋعا رۇقسات بەرىلمەك. بۇل تۋرالى ۇكىمەت وتىرىسىندا تسيفرلىق دامۋ، يننوۆاتسيالار جانە ايروعارىش ونەركاسىبى ءمينيسترى جاسلان ماديەۆ ايتتى.

«مينيسترلىكتە بايلانىس سالاسىندا تۋىندايتىن پروبلەمالاردى تۇراقتى قاداعالاۋ مەن شەشۋ ماقساتىندا جۇمىس ىستەيتىن جەدەل شتاب قۇرىلدى. وعان مينيسترلىكتىڭ، جەرگىلىكتى اتقارۋشى ورگانداردىڭ جانە بايلانىس وپەراتورلارىنىڭ وكىلدەرى كىرەدى. قوسىمشا شارا رەتىندە مينيسترلىكپەن ۇلتتىق قاۋىپسىزدىك كوميتەتىنىڭ كەلىسىمى بويىنشا مەملەكەتتىك مەكەمەلەردە بازالىق ستانتسيالاردى ورناتۋعا رۇقسات بەرۋ بولىگىندە زاڭعا تاۋەلدى اكتىگە وزگەرىستەر ەنگىزىلۋدە»، - دەدى مينيستر.
سونداي- اق ول Voice over Wi-Fi تەحنولوگياسىن ىسكە قوسۋ ماسەلەسى دە پىسىقتالىپ جاتقانىن ايتتى.
«بۇل - ءداستۇرلى ۇيالى جەلىلەردىڭ ورنىنا Wi-Fi جەلىلەرى ارقىلى داۋىستىق قوڭىراۋلار جاساۋعا مۇمكىندىك بەرەتىن تەحنولوگيا. VoWiFi راديو سيگنال وتپەيتىن، ءبىراق Wi-Fi بار جەراستى پاركينگتەرى نەمەسە عيماراتتاردا، ۇيالى بايلانىس جەلىسى ناشار جەرلەردە جاقسى بايلانىس ساپاسىن قامتاماسىز ەتە الادى. سونداي-اق بايلانىس سالاسىنداعى مەملەكەتتىك باقىلاۋ فۋنكسياسىن كەڭەيتۋ اياسىندا مينيسترلىك جەرگىلىكتى اتقارۋشى ورگاندارعا وسى سالادا مەملەكەتتىك باقىلاۋدى جۇزەگە اسىرۋ بويىنشا قۇزىرەت بەرۋدى ۇسىندى. ەل بويىنشا بايلانىس ساپاسىن جاقسارتۋ جونىندەگى جۇمىستارعا مونيتورينگ جۇرگىزۋ ماقساتىندا مينيسترلىك ارنايى سيفرلىق پلاتفورما ازىرلەدى. وندا بايلانىس تەحنولوگيالارىنىڭ تۇرلەرى بويىنشا جانە قازاقستاننىڭ بارلىق ەلدى مەكەندەرىن ساپالى بايلانىسپەن قامتاماسىز ەتۋ جونىندەگى وپەراتورلاردىڭ جوسپارلارى بويىنشا اقپارات ورنالاستىرىلاتىن بولادى»، - دەدى جاسلان ماديەۆ.
اۆتور
مارلان جيەمباي