قازاقستاندىق وقۋشىلاردان اسقورىتۋ، جۇيكە جانە كوز اۋرۋلارى ءجيى انىقتالادى

استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا وقۋ جىلىن قورىتىندىلاپ، مەكتەپ وقۋشىلارى اراسىندا قانداي اۋرۋلار ءجيى كەزدەسەتىنىن ايتىپ بەردى.

«بالالار اراسىندا اۋرۋشاڭدىق قۇرىلىمى بويىنشا ءبىرىنشى ورىندا - اسقورىتۋ جۇيەسى اۋرۋلارى (%9,7)، ەكىنشى ورىندا - جۇيكە جۇيەسى اۋرۋلارى (%9,1) جانە ءۇشىنشى ورىندا كوز اۋرۋلارى (%8,3) تۇر»، - دەدى دەنساۋلىق ساقتاۋ ءمينيسترى ۇكىمەتتىڭ بۇگىنگى وتىرىسىندا.

ونىڭ ايتۋىنشا، قازاقستان حالقىنىڭ %19- ىن جانە ەلىمىزدەگى بارلىق بالانىڭ %57- دان استامىن مەكتەپ جاسىنداعى بالالار قۇرايدى.

«ەلىمىزدە 7 مىڭنان استام مەكتەپ جۇمىس ىستەيدى. ءاربىر مەكتەپ سول اۋماققا قىزمەت كورسەتەتىن ەمحاناعا بەكىتىلگەن. مەكتەپتەردىڭ %90 مەيىرگەرمەن قامتىلعان. جىل سايىن ەمحانالار 17 جاسقا دەيىنگى بالالاردى پروفيلاكتيكالىق تەكسەرۋدەن وتكىزەدى»، - دەيدى ا. ءالنازاروۆا.

وسىلايشا، 2023 -جىلدىڭ قورىتىندىسىندا مەكتەپ جاسىنداعى 5,5 ميلليون بالا پروفيلاكتيكالىق تەكسەرۋدەن ءوتىپ، %9,3- ىندا ءتۇرلى اۋرۋشاڭدىق انىقتالعان. ناتيجەسىندە 210 مىڭ بالا ديسپانسەرلىك ەسەپكە الىنعان.

اۆتور

ايجان سەرىكجان قىزى