قازاقستاندىق مۇناي ازياعا قىزىل تەڭىزدى اينالىپ ءوتىپ تاسىمالدانادى - ب ا ق

استانا. قازاقپارات - Chevron كومپانياسى قازاقستاندىق CPC Blend مۇنايىن ازياعا يەمەندىك حۋسيتتەردىڭ شابۋىلىنا جول بەرمەۋ ءۇشىن قىزىل تەڭىز ارقىلى ەمەس، قايىرلى ءۇمىت ءمۇيىسى ارقىلى افريكانى اينالىپ ءوتىپ جونەلتەدى، دەپ حابارلايدى Reuters.

كوپتەگەن كومپانيالار حۋسيتتەردىڭ تەڭىز كەمەلەرىنە شابۋىلى كۇشەيگەن سايىن ەۋروپا مەن ازيا اراسىنداعى ەڭ قىسقا تەڭىز جولى - قىزىل تەڭىز مەن سۋەتس كانالىنان اينالىپ ءوتىپ، باعىتتارىن وزگەرتىپ ءجۇر.

قىزىل تەڭىزدەگى شابۋىلدار مەن تاسىمالداۋ شىعىندارى CPC Blend- ءتىڭ ازياعا جەتكىزىلىمىن شەكتەيتىن كورىنەدى.

CPC Blend مۇنايى يۋجنايا وزەرەيەۆكا كەنتىندەگى (نوۆوروسسيسك قالاسى) تەرمينالعا دەيىن تاسىمالدانىپ، وندا الەمدىك نارىققا جونەلتۋ ءۇشىن تانكەرلەرگە تيەلەدى. ازياعا ادەتتەگى باعدار قارا تەڭىزدەن جەرورتا تەڭىزىنە، ودان كەيىن سۋەتس كانالى ارقىلى وڭتۇستىككە وتەدى.

جەرورتا تەڭىزى ارقىلى باتىسقا، سودان كەيىن افريكانى اينالىپ وڭتۇستىككە قاراي جۇرەتىن جاڭا باعىت شىعىندار جانە جەتكىزۋ ۋاقىتىن ارتتىرىپ وتىر.

CPC Blend مۇنايىنىڭ باسىم بولىگى قازاقستاننان، ءبىر بولىگى رەسەيلىك كومپانيالاردان كەلەدى. دەرەككوزدەر مەن LSEG دەرەكتەرىنە سايكەس، رەسەيلىك CPC Blend مۇنايى قىزىل تەڭىز ارقىلى تاسىمالدانىپ وتىر.

قازاقستاندىق CPC Blend مۇنايىنىڭ ءىرى ەكسپورتتاۋشىسى «تەڭىزشيەۆرويل» ناقتى كەمەلەرگە قاتىستى تۇسىنىكتەمە بەرۋدەن باس تارتتى.

«Chevron قىزىل تەڭىز مەن تاياۋ شىعىستاعى باعىتتاردىڭ قاۋىپسىزدىگىن بەلسەندى تۇردە باعالاۋىن جالعاستىرىپ، سوڭعى وقيعالاردى نەگىزگە الىپ شەشىم قابىلدايدى»، - دەدى كومپانيادان.

اۆتور

زارينا تۋعانبايەۆا