قازاقستاندىق ماماندار قان وبىرىن ەمدەۋدە ەلەۋلى ناتيجەلەرگە قول جەتكىزدى
استانا. قازاقپارات - قان اۋرۋلارىن نەگىزىنەن ەكى ۇلكەن توپقا بولەدى. ەگەر ىسىك سۇيەك كەمىگىندە پايدا بولسا لەيكوز، ال ليمفويدتى تىندەردە قالىپتاسسا، ليمفوما دەپ دياگنوز قويىلادى.
ەمدەۋدىڭ باستى ءتاسىلى - حيميوتەراپيا. اۋىر جاعدايلاردا، ناۋقاستىڭ بەس جىل جانە ودان دا كوپ ۋاقىت ءومىر سۇرۋىنە مۇمكىندىك بەرۋ ءۇشىن سۇيەك كەمىگىن ترانسپلانتاتسيالاۋ قاجەت. قازاقستاندا مۇنداي وتانى ونكوگەماتولوگياعا ماماندانعان ورتالىقتا جاسايدى. كەيىنگى 15 جىلدا مۇندا 700 دەي ترانسپلانتاتسيا جۇرگىزىلگەن.
ۆاديم كەمايكين، ق ر دەنساۋلىق ساقتاۋ مينيسترلىگىنىڭ شتاتتان تىس باس گەماتولوگى:
- 2019-جىلى ءدال وسى ترانسپلانتاتسيا باعىتىندا توسەك-ورىن سانىن ارتتىرۋ تۋرالى شەشىم قابىلداندى، قازىر بىزدە 15 ورىن بار. ياعني ءبىز جىلىنا 150-180 ترانسپلانتاتسيا جاساۋدى جوسپارلاپ وتىرمىز. بۇل شىعىس ەۋروپا دەڭگەيىمەن شامالاس كورسەتكىش بولماق، سەبەبى ترانسپلانتاتسيا دەڭگەيى 10 ميلليون حالىققا شاققانداعى وپەراتسيا سانىمەن ولشەنەدى. بۇل جاقسى ناتيجە. ويتكەنى ترانسپلانتاتسيا - بۇل كۇردەلى پروتسەسس. ءبىز وعان ناۋقاستى الدىن الا دايىندايمىز.
ترانسپلانتاتسيادان كەيىن قالپىنا كەلتىرۋ شارالارى جۇرەدى. ادام جىلدار بويى ءبىزدىڭ باقىلاۋدا بولادى. ەكى جىل بۇرىن دارياحان ىرعايبەكوۆادان سۇيەك ميەلوماسى انىقتالعان. وتكەن جىلى اتيپيالىق جاسۋشالاردىڭ بەلسەندى ءوسىپ كەتۋىنە بايلانىستى ول سۇيەك كەمىگىن ترانسپلانتاتسيالاۋعا ءماجبۇر بولدى. بۇگىندە ناۋقاس ەكىنشى رەت حيميوتەراپيا كۋرسىن اياقتاپ، قالىپقا كەلۋ ۇستىندە.
دارياحان ىرعايبەكوۆا، استانا قالاسىنىڭ تۇرعىنى:
- ونكولوگ وسىنداي جەردە بار دەگەن سوڭ وسىندا كەلىپ، ءوزىم قارالدىم. قان ارالاسقان اۋرۋ. بيىل تاعى اۋىرىپ قالدىم. حيميوتەراپيا الىپ جاتىرمىن قازىر. قازىر جاقسىمىن. ۆراچتارعا ريزامىن.
بىلتىر ونكوگەماتولوگيا ورتالىعىندا سۇيەك كەمىگىن ترانسپلانتاتسيالاۋ بويىنشا 73 وپەراتسيا جاسالدى، 3 مىڭعا جۋىق ناۋقاسقا ەم-دوم كورسەتىلدى. مەديتسينالىق قىزمەتتەر قازاقستاندىقتارعا ەش اقىسىز، كەپىلدەندىرىلگەن تەگىن مەديتسينالىق كومەك اياسىندا كورسەتىلدى.
ايزات سۇلەيمەنوۆا، ۇ ع و و №2 ونكوگەماتولوگيا ءبولىمىنىڭ مەڭگەرۋشىسى:
- ءبىزدىڭ ورتالىققا ەلىمىزدىڭ كەز كەلگەن ايماعىنان ناۋقاستار كەلە الادى. ولار پورتال ارقىلى تۇسە الادى. ناۋقاستىڭ قىسقاشا قورىتىندىسى ءبىزدىڭ پوچتاعا تۇسەدى. بىزدەر قاراستىرامىز. ءسويتىپ ونى ايماقتاعى اۋرۋحانا پورتالعا قويىپ، ءبىز قابىلداي الامىز.
ەمنىڭ ءبارى بارلىق ناۋقاسقا تەگىن. كەلەسى جىلى ەلوردا دارىگەرلەرى قان وبىرىن ەمدەۋدىڭ تىڭ ءادىسى - CAR- T جاسۋشالىق تەراپياسىن ەنگىزۋدى جوسپارلاپ وتىر.
ۆاديم كەمايكين، ق ر دەنساۋلىق ساقتاۋ مينيسترلىگىنىڭ شتاتتان تىس باس گەماتولوگى:
- تەك ترانسپلانتاتسيامەن شەكتەلمەي، كەلەسى قادام - جاسۋشالىق تەحنولوگيالار، КАР-TИ- تەراپيا. كەيىنگى 5 جىلدىڭ ىشىندە ول ەۋروپادا عانا ەمەس، امەريكا مەن ازيادا دا دامىپ كەلەدى. بىزدە بۇل جوبا بىلتىردان باستاپ قولعا الىندى. ءۇمىتىمىز زور، قازاقستان ازاماتتارى بيىلعى جىلدىڭ سوڭىنا قاراي نە 2026 -جىلدىڭ باسىندا شەتەلگە شىقپاياق، وسى ەم ءتۇرىن ەلىمىزدە الا باستايدى دەپ ويلايمىز. جالپى، ءبىز وتانداستارىمىز ءۇشىن ونكوگەماتولوگيا سالاسىنداعى ساپالى مەديتسينالىق كومەكتىڭ قازاقستاندا قولجەتىمدى بولۋى ءۇشىن بارلىعىن جاساپ جاتىرمىز.
دارىگەرلەردىڭ ايتۋىنشا، قان وبىرىن ەرتە ساتىدا انىقتاۋ ءىس جۇزىندە وتە قيىن. اۋرۋ ەشقانداي بەلگى بەرمەي، كوپ جاعدايدا باسقا سىرقاتتار - انەميا، تاماق اۋرۋى، برونحيت بولىپ كورىنۋى مۇمكىن. كەيدە قان قۇرامىنداعى وزگەرىستەر تەك اۋرۋدىڭ ءورشىپ كەتكەن كەزەڭىندە عانا بىلىنەدى. الايدا ەمدى دەر كەزىندە باستاعان كەزدە ۇزاقمەرزىمدى رەميسسياعا قول جەتكىزۋگە، ءتىپتى كەيبىر تۇرلەرىندە تولىق ساۋىعىپ شىعۋعا مۇمكىندىك تۋادى.
24.kz
