قازاقستاندىق كىلەمدەر الەمدىك نارىققا شىقتى
استانا. قازاقپارات - وتاندىق كىلەم ءوندىرۋشى كومپانيا تۇڭعىش رەت حالىقارالىق ءىرى كورمەگە قاتىستى، دەپ حابارلايدى 24kz.

ىستامبۇلدا وتكەن كورمەگە قازاقستاندا توقىلعان كىلەمدەردىڭ ءتۇر-ءتۇرى قويىلدى. اسىرەسە، ۇلتتىق ناقىشتاعى كىلەمدەر كورمە قاتىسۋشىلارىنىڭ كوڭىلىنەن شىقتى. 20-عا جۋىق ەلدەن 400-دەن اسا كومپانيا قاتىسقان ءىس-شارا الەمدەگى ەڭ ءىرى كورمەلەردىڭ ءبىرى سانالادى. بۇل جەردە وندىرۋشىلەر ءوزارا تانىسىپ قانا قويماي، الەمنىڭ ءار تۇكپىرىنەن كەلگەن ساتىپ الۋشىلارمەن كەلىسىم شارت جاساسادى. كىلەم توقۋ سالاسىنداعى يننوۆاتسيالارمەن تانىسادى.
ارسەن داۋىتوۆ، تۇتىنۋشى (رەسەي):
- ءبىز ماگنيتوگورسك قالاسىنان كەلدىك. كىلەمدەردىڭ باعالارىن سالىستىرىپ، وندىرۋشىلەرمەن تانىسۋ ءۇشىن كورمەنى ارنايى ارالاپ ءجۇرمىز. ەڭ ادەمى ءارى ەرەكشە كىلەمدەر قازاقستاندىق فابريكانىڭ كىلەمدەرى ەكەن. ەندى الداعى ۋاقىتتا ءىرى كولەمدە تاپسىرىس بەرۋدى جوسپارلاپ وتىرمىز.
تالعات ىسقاقوۆ، كىلەم ءوندىرۋشى كومپانيانىڭ باسشىسى:
- ىستامبۇل قالاسىنداعى بۇكىلالەمدىك كىلەم كورمەسىنە كەلۋدەگى ماقساتىمىز - قازاق كىلەمى دەگەن برەندتى الەمگە تانىتۋ. قازاق ءوندىرىسى، قازاق مادەنيەتى، قازاقتىڭ ۇلتتىق ويۋ، ۇلتتىق ونەرىن مىنا ءبىزدىڭ قازاقستاندا شىعىپ جاتقان كىلەمدەردى الەمگە تانىتىپ، ساتىلىمدى كوبەيتۋ.