قازاقستاندىق كومپانيالار Alibaba-دا قانداي تاۋار ساتىپ جاتىر

استانا. قازاقپارات  - 2023 -جىلى قىتايدىڭ ەڭ ءىرى B2B ماركەتپلەيسىنە 70 قازاقستاندىق كومپانيا تىركەلىپ، ولارعا «التىن جەتكىزۋشى» پرەميۋم مارتەبەسىندەگى اككاۋنتتار بەرىلدى. ق ر ساۋدا جانە ينتەگراتسيا مينيسترلىگى وتاندىق كومپانيالار بۇل ماركەتپلەيستە قانداي تاۋارلار ۇسىناتىنىن ءمالىم ەتتى، دەپ حابارلايدى Kazinform اگەنتتىگى.

ۆەدومستۆونىڭ مالىمەتىنشە، Alibaba.com پلاتفورماسىندا قازاقستاندىق جەتكىزۋشىلەر ۇسىناتىن جانە ەكسپورتتايتىن نەگىزگى تاۋار ساناتتارى تومەندەگىدەي:

ازىق-تۇلىك پەن اۋىل شارۋاشىلىعى ونىمدەرى: بال، كۇرىش، حالال ەت، كۇنباعىس مايى، ماكارون ونىمدەرى، ۇن، جارمالار، جاڭعاقتار، تۇقىمدار، قۇرعاق بيە جانە تۇيە ءسۇتى، كونسەرۆىلەر، مال ازىعىنا ارنالعان قوسپالار جانە ت. ب.

كونديتەرلىك ونىمدەر مەن سنەكتەر: شوكولاد، كامپيت، پەچەنە جانە باسقا دا تاتتىلەر.

ونەركاسىپتىك ونىمدەر: ديزەلمەن جۇمىس ىستەيتىن گەنەراتورلار، ەلەكتر جابدىقتارى، ەلەكتر قالقاندارى، كابەل ناۋاشالارى، ورتكە قارسى قالقاندار، مەتالل تاباقتاردان جاسالعان ستاندارتتى ەمەس جابدىقتار، پوليەتيلەننەن جاسالعان كابەلدىك قۇبىرلار، اسپاپتار مەن قۇرىلعىلار، كومىر سۇزگىلەرى، مەكتەپ جيھازى.

الكوگولدى جانە الكوگولسىز ونىمدەر: شاراپ، اراق، تابيعي شىرىندار.

ماتا جانە كيىم-كەشەك: ءارتۇرلى توقىما بۇيىمدارى مەن كيىمدەر.

حيميالىق ونىمدەر: ايەلدەرگە ارنالعان كوسمەتيكا، مەديتسينالىق ماقساتتاعى بۇيىمدار، ب ب ق (بيولوگيالىق بەلسەندى قوسپالار).

ايتا كەتەيىك، بۇعان دەيىن ەلىمىزدەن شىعاتىن شيكىزات ەمەس تاۋارلار كولەمى ارتىپ كەلە جاتقانىن جازعان ەدىك.

اۆتور

ەربول جانات