قازاقستاندىق شەنەۋنىك ا ق ش تەلەارناسىنا سۇحبات بەردى

وتكەن اپتا شەتەلدىڭ باسپا ءسوزى قازاقستاننىڭ جاسىل ەنەرگەتيكا، سيفرلىق جۇيەسى تۋرالى جازسا، بۇل اپتا ەۋروپالىق ينۆەستورلاردىڭ ەلىمىزگە وڭ كوزقاراسى، ورتالىق ازيا، ونىڭ ىشىندە قازاقستاننىڭ ترانزيت ءدالىزى رەتىندە الەۋەتى ارتقانىن حابارلادى.

سونداي- اق، قازاقستاندىق شەنەۋنىك ا ق ش تەلەارناسىنا سۇحبات بەردى. بۇدان بولەك حالىقارالىق باسىلىمدار ەلىمىزگە قاتىستى قانداي اقپارات جازعانىنا Kazinform ساراپشىسى شولۋ جاسادى.

ورتالىق ازيا ساۋدا دالىزىنە قىزىعۋشىلىق ارتتى

شەتەلدىك ب ا ق وسى اپتادا ورتالىق ازيا ەلدەرى، ونىڭ ىشىندە قازاقستاننىڭ ساۋدا ءدالىزى رەتىندە الەۋەتى كۇشەيگەنىن جازدى. voanews.com باسىلىمىنىڭ ۆاشينگتوننان حابار تاراتقان ءتىلشىسى «ورتا ءدالىزدىڭ پايدا بولۋى - ازيانى ورتالىق ازيا، كاسپيي تەڭىزى جانە كاۆكاز ارقىلى ەۋروپالىق نارىقتارمەن بايلانىستىراتىن ترانزيتتىك جەلى رەسەيدىڭ باقىلاۋىنداعى مارشرۋتتارعا بالاما رەتىندە تەز قارقىن الىپ جاتىر» دەپ جازدى.

باسىلىم ترانسكاسپي حالىقارالىق كولىك مارشرۋتى (TITR) قاۋىمداستىعىنىڭ باسشىسى گايدار ابدىكەرىموۆتىڭ قىزمەتى تۋرالى باياندادى. قازىر بۇل قاۋىمداستىقتىڭ جەلىسىندە پورتتار، كەمەلەر، تەمىرجول مەن تەرمينالداردى قوسا العاندا، 25 كولىك- لوگيستيكالىق كومپانيا بار. سونىمەن قاتار، وعان 11 مەملەكەت كىرەدى: ازەربايجان، گرۋزيا، قازاقستان، تۇركيا، ۋكراينا، پولشا، رۋمىنيا، بولگاريا، ليتۆا، قىتاي جانە سينگاپۋر.

- مۇنىڭ ءبارى ءبىزدىڭ باعىتىمىزعا قىزىعۋشىلىقتىڭ جوعارى ەكەنىن بىلدىرەدى... سوڭعى 10 ايدا باعىت بويىنشا 2,256 ميلليون توننادان استام جۇك تاسىمالداندى. ءبىز ترانزيتتىك كونتەينەرلىك پويىزداردى جەتكىزۋدىڭ بولجامدى ۋاقىتىن 38 كۇننەن 19 كۇنگە دەيىن قىسقارتتىق، - دەپ كەلتىردى باسىلىم ابدىكەرىموۆتىڭ ءسوزىن.

سونداي- اق، باسىلىم «ابدىكەرىموۆتىڭ كەڭسەسى قازاقستاننىڭ باس قالاسى استانادا ورنالاسقان. مۇنايعا باي رەسپۋبليكا قىتايدىڭ سولتۇستىك-باتىس شەكاراسىنان كاسپي تەڭىزىنە دەيىن سوزىلىپ جاتىر، جۇكتەردى كەمەلەرگە تيەپ، كاۆكازداعى ازەربايجانعا جەتكىزۋگە بولادى» دەپ جازدى.

ايتا كەتەيىك، ورتالىق ازيا جانە قازاقستاننىڭ الداعى باعىتى قانداي بولادى؟ وسى جانە وزگە دە ماسەلەلەردى ەلوردا تورىندە جينالعان حالىقارالىق ساراپشىلار تالقىلادى. بۇل تۋرالى مىنا جەردە جازعانبىز.

ەۋرووداق ەلدەرىنەن قازاقستانعا قۇيىلعان ينۆەستيتسيا كولەمى بەلگىلى بولدى

قازىر ەۋروپالىق وداق - قازاقستان ءۇشىن ەڭ ءىرى ساۋدا جانە ينۆەستيتسيالىق سەرىكتەس. ەۋروپادان ەلگە قۇيىلعان ينۆەستيتسيانىڭ جالپى كولەمى 175 ميلليارد دوللاردان استى. بۇل تۋرالى ق ر پرەمەر- ءمينيسترى ءاليحان سمايىلوۆ «قازاقستان- ەۋروپالىق وداق» ديالوگتىق الاڭىنىڭ 13- وتىرىسىندا ايتتى. مۇنداي اقپاراتتى ازەربايجاندىق trend.az جازدى.

- اتاپ ايتقاندا، سوڭعى 6 ايدا ەۋرووداق ەلدەرى قازاقستان ەكونوميكاسىنا 5,2 ميلليارد دوللاردان استام ينۆەستيتسيا سالعانىن جەتكىزدى. سونداي- اق، پرەمەر- مينيستر ەۋروپالىق وداقتىڭ قازاقستاننىڭ سىرتقى ساۋداسىنداعى ۇلەسى شامامەن 30 پايىزدى قۇرايتىنىن اتاپ ءوتتى. ونىڭ ايتۋىنشا، 10 ايدا تاراپتار اراسىنداعى جالپى تاۋار اينالىمى 34 ميلليارد دوللاردان استى. پرەمەر- مينيستر بۇل كورسەتكىشتەر ساۋدا- ەكونوميكالىق ىنتىماقتاستىقتى نىعايتۋدىڭ دايەكتى باعىتىن كورسەتەتىنىن اتادى، - دەپ جازدى باسىلىم.

سونداي- اق، trend.az ءاليحان سمايىلوۆقا سىلتەمە جاساپ، قازىرگى تاڭدا قازاقستان ەكونوميكاسىنىڭ ءتۇرلى سالالارىندا 3 مىڭنان استام ەۋروپالىق كومپانيا تابىستى جۇمىس ىستەپ جاتقانىن، ونىڭ ىشىندە Shell, Eni, Air Liquide, Alstom جانە Claas سياقتى ءىرى ترانسۇلتتىق كورپوراتسيالار بار ەكەنىن حابارلادى.

قازاقستان سيرەك ماتەريالداردى جەتكىزۋشى رەتىندە ماڭىزدى ءرول اتقارا الادى - مينيستر

اگروونەركاسىپ جانە قۇرىلىس ءمينيسترى قانات شارلاپايەۆ امەريكالىق CNBC تەلەارناسىنا بەرگەن سۇحباتىندا قازاقستاننىڭ ماڭىزدى شيكىزاتتى ەۋروپاعا كوبىرەك جەتكىزە باستاعانى تۋرالى ءبولىسىپ، ArcelorMittal كومپانياسىمەن كەلىسىمنىڭ ءساتتى اياقتالۋىن تالقىلادى.

مينيستر باسىلىمعا قازاقستان قازىردىڭ وزىندە ەۋروپالىق كوميسسيا تىزبەكتەگەن 34 سيرەك كەزدەسەتىن ماتەريالدىڭ 18- ءىن ءساتتى شىعارىپ جاتقانىن مالىمدەدى.

سونداي- اق، مينيستردەن ArcelorMittal كومپانياسىمەن جاقىندا جاسالعان ءساتتى كەلىسىم تۋرالى سۇرالدى.

- ول تاراپتاردىڭ ءوزارا كەلىسىمى نەگىزىندە ءساتتى اياقتالدى. ArcelorMittal ءوزىنىڭ قازاقستاندىق بولىمشەسىن مەملەكەت پايداسىنا ساتۋعا شەشىم قابىلدادى، الايدا كومپانيا جۇمىسىن جالعاستىرا بەرەتىنىن اتاپ وتكەن ءجون. بۇل ورتالىق ازيا ءۇشىن بىرەگەي بولات ءوندىرۋشى جانە كومپانيانىڭ جىلىنا 4 ميلليون تونناعا دەيىن مەتالل ونىمدەرىن شىعارۋعا مۇمكىندىگى بار، - دەدى قانات شارلاپايەۆ.

قازاقستان تاجىكستانعا تەمىرجول جۇك تاسىمالىنا جەڭىلدىكتەر ۇسىنادى

قازاقستان تەمىر جولى تاجىكستاننىڭ جۇك تاسىمالداۋشىلارىنا % 30- دان %50- عا دەيىن جەڭىلدىكتەر ۇسىنىپ، جۇك كولەمىن ۇلعايتۋعا جاردەمدەسەدى. بۇل تۋرالى قازاقستاننىڭ تاجىكستانداعى ەلشىسى ءۋاليحان تۇراحانوۆ تاجىكستاننىڭ كولىك ءمينيسترى ازيم يبراحيممەن كەزدەسۋدە ايتتى. بۇل تۋرالى trend.az باسىلىمى جازدى.

- قازىرگى تاڭدا ەكى ەل اراسىندا بەس اۆتوموبيل باعىتى بار، ال بيىل 11 ايدا جولاۋشىلار تاسىمالى 5259 ادامدى قۇرادى. كەزدەسۋدە تاراپتار جول- كولىك سالاسىنداعى ىنتىماقتاستىقتى كەڭەيتۋ جوسپارلارىن تالقىلاپ، كولىك سالاسىندا كەڭەيتۋگە نيەتتەرىن ءبىلدىردى، - دەپ جازدى باسىلىم.

اۆتور

باقىتجان سەرىك ۇلى