قازاقستاندىق عالىمدار ۆاتيكان ارحيۆىندەگى ماتەريالدارمەن تانىسادى
استانا. KAZINFORM - قازاقستاندىق عالىمدار ۆاتيكانداعى اپوستول كىتاپحاناسىنىڭ مۇراعاتىنا بارىپ، بۇرىن قولجەتىمسىز بولعان ماتەريالدارمەن تانىسادى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى.
ءمينيستردىڭ ايتۋىنشا، ءۇش جىل بۇرىن قازاقستاننىڭ شىعىس تانۋ ينستيتۋتى مەن ۆاتيكان كىتاپحاناسى اراسىندا كەلىسىمگە قول قويىلدى.
«بيىل ءبىزدىڭ عالىمداردىڭ ءبىرىنشى توبى ريمگە بارىپ، العاش رەت اپوستول كىتاپحاناسىنىڭ جابىق مۇراعاتىنا رۇقسات الادى. بۇل 10 -عاسىردان باستاپ ءبىزدىڭ ايماقتارعا كەلگەن يەزۋيتتەر مەن دومينيكاندىقتاردىڭ ميسسيالارى تۋرالى ەسەپتەر. ولار ارنايى منەموتەحنيكا بويىنشا وقىتىلعان جانە ايلار بويى كورگەن-بىلگەنىن مۇقيات جازىپ وتىرعان. ءبىزدىڭ عالىمدارعا بۇرىن جابىق بولعان دەرەككوزدەرمەن تانىسۋعا مۇمكىندىك بەرىلەدى، جاڭا تاريحي فاكتىلەر دە اشىلۋى مۇمكىن. بۇل تۋرالى قوسىمشا حابارلايمىز»، - دەدى ساياسات نۇربەك ورتالىق ازيا مەملەكەتتەرى تاريحشىلارىنىڭ I فورۋمىندا.
بۇعان دەيىن دە قازاق عالىمدارى ۆاتيكان كىتاپحاناسىنداعى تۇركى تاريحىنا قاتىستى قولجازبالاردى زەرتتەۋگە مۇمكىندىك الاتىنى حابارلانعان ەدى.
ايتا كەتەيىك، ەۋرازيا ۇلتتىق ۋنيۆەرسيتەتىندە «ورتالىق ازيا تاريحى: حالىقتار مەن مادەنيەتتەر اراسىنداعى ديالوگ» اتتى ورتالىق ازيا مەملەكەتتەرى تاريحشىلارىنىڭ 1- فورۋمى ءوتتى.
فورۋمعا قازاقستان، قىرعىزستان، وزبەكستان، تاجىكستان، تۇركىمەنستان عالىمدارى، سونداي-اق مەملەكەت جانە قوعام قايراتكەرلەرى كەلدى.
اۆتور
ايجان سەرىكجان قىزى
