قازاقستاندا پوليتسياداعى ورتا بۋىن باسشىلارى جاپپاي تەكسەرىلەدى

лепеха
Фото: Кazinform

استانا. KAZINFORM – ق ر ىشكى ىستەر ءمينيسترىنىڭ ورىنباسارى يگور لەپەحا قىز زورلادى دەگەن كۇدىكپەن قاماۋعا الىنعان تالدىقورعان پوليتسيا باسقارماسىنىڭ باستىعىنا قاتىستى قوزعالعان ءىس بويىنشا پىكىر ءبىلدىردى.

بۇگىن سەناتتا تىلشىلەر ءمينيستردىڭ ورىنباسارىنان وسى ءىستى تەرگەۋ بارىسى جايىندا سۇرادى.

«ءىستىڭ قاي ساتىدا ەكەنىن ايتا المايمىن. تەرگەۋ ءجۇرىپ جاتىر، ماتەريال سوتقا جىبەرىلگەن كەزدە جاريالانادى»، - دەدى ي. لەپەحا.

سونىمەن قاتار ول وسى وقيعادان كەيىن مينيسترلىك قۇرىلىمىندا قانداي شارا قابىلدانعانىن ايتتى.

«وسى ماسەلەنى ۆەدومستۆونىڭ القا ماجىلىسىندە قاراپ، جەكە قۇراممەن جانە پوليتسيا دەپارتامەنتتەرى وكىلدەرىمەن كەزدەستىك. جەكە قۇرام اراسىندا ءتارتىپتى كۇشەيتۋ شارالارى ۇنەمى قولدانىلىپ كەلەدى. سونىڭ ءبىرى - اتتەستاتسيا. جەكە قۇراممەن جۇمىس ىستەۋگە ءبىرىنشى كەزەكتە جاۋاپتى ورتا بۋىن باسشىلارىن تەكسەرىپ، اتتەستاتسيادان وتكىزىپ، تالاپقا ساي كەلمەيتىندەرىن شىعارامىز. ەگەر پوليتسەيلەر زاڭسىز ارەكەتتەرگە بارىپ جاتسا، وندا وزىندىك قاۋىپسىزدىك قىزمەتى مەن كادرلىق بولىمشەلەر قىزمەتكەرلەرى وسى ادامداردى ەرتەرەك انىقتاماعىن ءۇشىن جاۋاپ بەرەدى»، - دەدى ءمينيستردىڭ ورىنباسارى.

بىلتىر كۇزدە وبلىس ورتالىعىنىڭ باس پوليتسەيى قىزمەتىن اتقارعان مارات كۇشتىبايەۆتىڭ قىزمەتىن اسىرا پايدالانىپ، جۇمىس كابينەتىندە زورلىق جاساعانى جونىندە بۇعان دەيىن جازعانبىز. وسى وقيعاعا بويىنشا جابىرلەنگەن ادامنىڭ ادۆوكاتى نۇرلان مولبايەۆ زورلىقتىڭ قالاي جاسالعانىن ايتىپ بەردى.

تالدىقورعاندا قىز زورلادى دەگەن كۇدىكپەن ۇستالعان پوليتسەي قالالىق مامانداندىرىلعان سوتتىڭ سانكسياسىمەن ەكى اي مەرزىمگە قامالدى.

اۆتور

رۋسلان عابباسوۆ

سوڭعى جاڭالىقتار