قازاقستاندا ەسكى كولىكتەرگە سالىناتىن سالىق وزگەرۋى مۇمكىن

استانا. KAZINFORM – ق ر قارجى ۆيتسە-ءمينيسترى ەرجان ءبىرجانوۆ ەلىمىزدە كولىك سالىعىنىڭ مولشەرىن قايتا قاراۋ مۇمكىندىگىنە تۇسىنىك بەردى.

«قازىر كولىككە قاتىستى جۇمىس توبى ءتيىستى تالقىلاۋ وتكىزدى. ءبىز بۇل ماسەلەنى «اتامەكەن» ۇلتتىق كاسىپكەرلەر پالاتاسىمەن ۇكىمەت دەڭگەيىندە قاراستىرىپ جاتىرمىز. رەسمي مالىمدەمە جاساۋعا ءالى ەرتە، ويتكەنى شەشىم ءالى تۇپكىلىكتى قابىلدانعان جوق. ءبىز 20-30 جىل پايدالانىلىپ كەلە جاتقان ەسكى كولىككە قاتىستى ماسەلە كوتەرىپ جاتىرمىز. ياعني، تۇزەتۋ كوەففيتسيەنتىن قولدانۋدى ۇسىندىق، ياعني ولارعا جاڭا اۆتوموبيلگە ارنالعان ستاۆكا بويىنشا سالىق سالىنبايدى. سونىمەن قاتار، حالىققا جۇكتەمەنى ازايتۋعا باعىتتالعان باسقا دا ۇسىنىستار بار. ال ەگەر تىم قىمبات كولىك بولسا، بۇل رەتتە ءسان-سالتانات سالىعى ەسكەرىلمەك. وسى ارقىلى سالىق جۇكتەمەسىن قايتا ءبولۋ مۇمكىندىگى پىسىقتالىپ جاتىر»، - دەدى ە. ءبىرجانوۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

بۇل تۇرعىدا ۆيتسە- مينيستر بۇل ۇسىنىستار بويىنشا ناقتى شەشىم جاسالماعانىن اتاپ ءوتتى.

«بۇكىل ۇسىنىستار پىسىقتالعاننان كەيىن تۇپكىلىكتى شەشىم قابىلدايمىز. جاقىندا جاڭا سالىق كودەكسىنىڭ جوباسى تانىستىرىلادى»، - دەدى ول.

اۆتور

رۋسلان عابباسوۆ