قازاقستاندا قانشا كومىر قورى بار

استانا. KAZINFORM - قازاقستان كومىر قورى بويىنشا الەمدە العاشقى 10 ەلدىڭ قاتارىنا كىرەدى. بۇل تۋرالى ونەركاسىپ جانە قۇرىلىس مينيسترلىگى ونەركاسىپ كوميتەتىنىڭ كومىر ونەركاسىبى باسقارماسىنىڭ باسشىسى جانات يگىسىنوۆ ءمالىم ەتتى.

- بۇگىندە بىزدە 33 ميلليارد 600 ميلليون توننا كومىر قورى بار. بۇل گەولوگيالىق بارلاۋ كەزىندە انىقتالعان. قازاقستان كومىر قورى بويىنشا الەمدە العاشقى 10 ەلدىڭ قاتارىنا كىرەدى. قازىرگى ءبىزدىڭ ماقسات - الدىمەن كوممۋنالدىق قاجەتتىلىكتى، سوسىن حالىقتى، ودان كەيىن ءوندىرىس ورىندارى مەن ەنەرگەتيكالىق كەشەندى كومىردى قامتۋ، - دەدى جانات يگىسىنوۆ ەلوردادا وتكەن VI كومىر ونەركاسىبى فورۋمىندا.

ونىڭ ايتۋىنشا، كومىر تاپشىلىعى ماسەلەسىنىڭ الدىن الۋ ءۇشىن رەسپۋبليكالىق شتاب بار، ول جۇمىسىن قىركۇيەكتە باستايدى.

- كۇن سايىن جەرگىلىكتى اتقارۋشى ورگاندارى، كومىر وندىرۋشىلەر جانە قازاقستان تەمىر جولى وكىلدەرىمەن بايلانىستامىز. قاي وڭىردە كومىر جەتپەي جاتىر، وعان نە سەبەپ، كومىر ۆاگوندارى نەگە كەتپەي جاتىر؟ دەرەۋ حابار الماسىپ وتىرامىز، سوڭعى جىلدارى بۇل ماسەلە جولعا قويىلدى، - دەيدى ول.

ايتا كەتسەك، ەلىمىزدە وتكەن جىلدىڭ ءتورت ايىندا 36,4 ميلليون توننا كومىر وندىرىلسە، بيىلعى 4 ايدا ءوندىرىس كولەمى 4,3 پايىزعا ارتقان. ونەركاسىپ جانە قۇرىلىس ءمينيسترىنىڭ ايتۋىنشا، وتكەن جىلى جىلىتۋ ماۋسىمىندا كوممۋنالدىق- تۇرمىستىق سەكتور 7,9 ميلليون توننا كومىر تۇتىنادى دەپ جوسپارلاندى جانە بارلىق تۇتىنۋشى تولىق كولەمدە كومىرمەن قامتىلىپ، جوسپار 101 پايىزعا ورىندالعان.

اۆتور

داۋلەت ىزتىلەۋ