قازاقستاندا موپەد جۇرگىزۋشىلەرىنە جاڭا تالاپتار قويىلادى

استانا. KAZINFORM - بۇگىن ءماجىلىستىڭ جالپى وتىرىسىندا «جول ءجۇرىسى تۋرالى» زاڭىنا جەكەلەگەن كولىك قۇرالدارى تۇرلەرىنىڭ ءجۇرۋىن ۇيىمداستىرۋ جانە جول قاۋىپسىزدىگىن سيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

«زاڭ جوباسى كولىكتىڭ وسى ءتۇرىنىڭ قوزعالىسىن رەتتەۋ جونىندەگى جۇمىستىڭ جالعاسى سانالادى. سەبەبى موپەدتەردىڭ كوبەيۋى جولداردا ولاردىڭ قوزعالىسىن رەتتەۋدى قاجەت ەتەدى. قازىر موپەدتەر ارزان كولىك تۇرلەرىنىڭ ءبىرى. موپەدتەردىڭ كوبەيۋى دە جولدارداعى كولىك اپاتتارىنا اسەر ەتەدى. تەك 2023 -جىلى اپات سانى 750 بولدى، بۇل كورسەتكىش 2022 -جىلمەن سالىستىرعاندا ءتورت ەسە كوپ»، - دەدى ءماجىلىس دەپۋتاتى ەكاتەرينا سمىشياليەۆا.

زاڭ جوبالارىندا:

- قوزعالتقىش كولەمى 50 تەكشە سانتيمەتردەن كەم موپەدتەردى مەملەكەتتىك تىركەۋ؛

- موپەد جۇرگىزۋشىنە قويىلاتىن تالاپتاردى بەلگىلەۋ؛

- جەرگىلىكتى اتقارۋشى ورگاندارعا ەلەكتر ساموكاتتاردى پايدالانۋ ءتارتىبىن ايقىنداۋ بويىنشا قۇزىرەت بەرۋ؛

- جول قاۋىپسىزدىگىن سيفرلاندىرۋ بويىنشا نورمالار ۇسىنىلدى.

«سونىمەن قاتار، اكىمشىلىك قۇقىق بۇزۋشىلىق تۋرالى كودەكستىڭ اياسىندا رۇقسات ەتىلگەن جىلدامدىقتى الدەقايدا اسىرىپ جۇرەتىن ادامداردىڭ جاۋاپكەرشىلىگىن كۇشەيتۋدى ەسكەرىلگەن. مۇنىمەن قوسا، موپەد جۇرگىزۋشىسىن مەحانيكالىق كولىك قۇرالدارى جۇرگىزۋشىمەن تەڭەستىرۋ قاراستىرىلعان»، دەدى دەپۋتات.

بۇدان بولەك، جولداردى جانە جول قۇرىلىسجايلارىن كۇتىپ ۇستاۋعا بايلانىستى قۇقىق بۇزۋشىلىقتاردى قايتالاپ جاساعانى ءۇشىن لاۋازىمدى ادامداردىڭ جاۋاپكەرشىلىگى ارتادى.

اۆتور

رۋسلان عابباسوۆ