قازاقستاندا جەكە دەتەكتيۆتەردىڭ قىزمەتى زاڭداستىرىلماق

жеке детектив
Фото: pexels.com

استانا. KAZINFORM - ەلىمىزدە جەكە دەتەكتيۆتەر تۋرالى زاڭ جوباسى ازىرلەنىپ جاتىر.

«جەكە دەتەكتيۆتەردىڭ قىزمەتىن زاڭداستىرۋ ارىدەن كەلە جاتقان ماسەلە. ايتالىق، قىلمىس جاسالسا، ءبىر دوكەي سول ءوڭىردىڭ پوليتسيا باستىعىنا ءبىر قوڭىراۋ شالىپ، ءىستى جاپتىرىپ تاستاۋى مۇمكىن. ال جەكە دەتەكتيۆ جالداساڭىز ول قىزمەت مىندەتىنە ساي اتقارادى. ونىڭ تاپقان دالەل، دايەكتەرى قىلمىستىق ءىستى اشۋعا قوسىمشا دەرەك بولادى. سوندىقتان بۇل سالانى قۇقىقتىق تۇرعىدان رەتتەۋ الدەقاشان ءپىسىپ-جەتىلگەن ماسەلە دەپ ەسەپتەيمىن. جەكە دەتەكتيۆتەرگە قويىلاتىن باستى تالاپتىڭ ءبىرى ىشكى ىستەر سالاسىندا 10 جىلدان استام جۇمىس ىستەگەن بولۋى ءتيىس»، - دەدى ءماجىلىس دەپۋتاتى ابزال قۇسپان «قازاقستانداعى جەكە دەتەكتيۆتىك قىزمەتتى زاڭنامالىق رەتتەۋدىڭ پروبلەمالىق ماسەلەلەرى مەن پەرسپەكتيۆالارى» تاقىرىبىندا وتكەن دوڭگەلەك ۇستەل بارىسىندا.

حالىق قالاۋلىسىنىڭ ايتۋىنشا، ەلىمىزدە جەكە دەتەكتيۆتەردىڭ ينستيتۋتىن قۇرۋ كەرەك.

«ونىڭ قىزمەتى رەسپۋبليكالىق جانە وبلىستىق دەڭگەيدە بولعانى ابزال. ازىرلەنىپ جاتقان جەكە دەتەكتيۆتەر تۋرالى زاڭنامادا ولارعا ليتسەنزيا بەرۋ جاعى قاراستىرىلىپ جاتىر. ول ءۇشىن ۋاكىلەتتى ورگان بەلگىلەنەدى، ەگەر جەكە دەتەكتيۆ زاڭ تالاپتارىن بۇزعان جاعدايدا، ۋاكىلەتتى ورگان ونىڭ ليتسەنزياسىن توقتاتۋعا نەمەسە تارتىپ الۋعا قۇقىلى. قازىر ەلىمىزدە جەكە دەتەكتيۆ قىزمەتى بار، ءبىراق ول كولەڭكەلى تۇردە. ەگەر ءبىز بۇل قىزمەتتى زاڭداستىرساق، بيۋدجەتكە قاراجات تۇسەر ەدى. ەڭ باستىعى ولاردىڭ قىزمەتى زاڭداستىرىلادى»، - دەيدى ول.

سونداي-اق، دەپۋتات ەلىمىزدە جەكە دەتەكتيۆتەرگە قاتىستى رەسمي ستاتيستيكالىق مالىمەتتەردىڭ جوقتىعىن ايتتى.

«بۇگىنگى تاڭدا ولار جاسىرىن تۇردە جۇمىس ىستەيدى. ياعني كوللەكتور نەمەسە كۇزەت فيرماسى ارقىلى تاعى سول سياقتى. ولاردىڭ قىزمەتى زاڭمەن رەتتەلمەگەننەن كەيىن، زاڭ سالاسىندا پايدالانا المايمىز. سونىمەن قاتار ولار مەملەكەتكە سالىق تولەپ وتىرعان جوق. جەكە دەتەكتيۆتەر اتى ايتىپ تۇرعانداي، جەكە تۇردە قىزمەت كورسەتەدى، ول جەكە تۇلعاعا نەمەسە ۇيىمعا بولۋى مۇمكىن. دامىعان ەلدەردە اتالعان قىزمەت الدەقاشان زاڭداستىرىلعان»، - دەيدى ابزال قۇسپان.

جەكە دەتەكتيۆتەردىڭ ازاماتتاردىڭ جەكە مالىمەتتەرىن الىپ، تانىسۋعا قۇقىعى بار ما؟ بۇل ساۋالعا پارلامەنتاريزم ينستيتۋتىنىڭ ساراپشىسى نۇرتاي يمانعاليەۆ جاۋاپ بەردى.

«جەكە دەتەكتيۆتەر قازاقستان رەسپۋبليكاسىنىڭ كونستيتۋتسياسى، سودان سوڭ ازىرلەنىپ جاتقان «جەكە دەتەكتيۆتىك قىزمەت تۋرالى» قازاقستان رەسپۋبليكاسى زاڭىنىڭ جوباسى مەن باسقا دا نورمالار، اكتىلەردى قاتاڭ ساقتاۋى ءتيىس. بۇل زاڭ جوباسىنا وزگەرىستەر ەنگىزىلۋى مۇمكىن»، - دەدى نۇرتاي يمانعاليەۆ ەلوردادا «قازاقستانداعى جەكە دەتەكتيۆتىك قىزمەتتى زاڭنامالىق رەتتەۋدىڭ پروبلەمالىق ماسەلەلەرى مەن پەرسپەكتيۆالارى» تاقىرىبىندا وتكەن دوڭگەلەك ۇستەل بارىسىندا.

ساراپشىنىڭ مالىمەتىنشە، زاڭ جوباسى ازىرگە 5 تاراۋدان، 25 باپتان تۇرادى.

«جەكە دەتەكتيۆتەردىڭ قىزمەتى اقىلى، ول كەلىسىمشارت جاساۋ ارقىلى شەشىلەدى. ارينە، جەكە دەتەكتيۆتەرگە ليتسەنزيا بەرىلەدى جانە ولار ءۇشىن ازاماتتاردىڭ جەكە دەرەكتەرىنە قولجەتىمدى بولۋى مۇمكىن»، - دەيدى ول.

بۇعان دەيىن نۇرتاي يمانعاليەۆ جەكە دەتەكتيۆتەرگە قويىلاتىن تالاپتارمەن تانىستىرعان ەدى.

ايتا كەتەيىك، بۇگىن استانادا ق ر پرەزيدەنتى ءىسى باسقارماسى جانىنداعى پارلامەنتاريزم ينستيتۋتى «AMANAT» پارتياسىنىڭ قوعامدىق ساياسات ينستيتۋتىمەن بىرلەسىپ ۇيىمداستىرعان «قازاقستانداعى جەكە دەتەكتيۆتىك قىزمەتتى زاڭنامالىق رەتتەۋدىڭ پروبلەمالىق ماسەلەلەرى مەن پەرسپەكتيۆالارى» تاقىرىبىندا دوڭگەلەك ۇستەل ءوتتى.

«جەكە دەتەكتيۆتىك قىزمەت تۋرالى» قازاقستان رەسپۋبليكاسى زاڭىنىڭ جوباسى دەپۋتاتتار مەن پارلامەنتاريزم ينستيتۋتى عالىمدار جانە ساراپشىلاردى تارتا وتىرىپ، ق ر پارلامەنتى ماجىلىسىمەن ءوزارا ءىس-قيمىل جوسپارى شەڭبەرىندە ازىرلەنىپ جاتىر.

اۆتور

داۋلەت ىزتىلەۋ

سوڭعى جاڭالىقتار