قازاقستاندا فرانسۋز ينۆەستيتسياسى بار 170 كومپانيا جۇمىس ىستەيدى

استانا. KAZINFORM - استانادا قازاقستان مەن فرانسيا اراسىنداعى ىسكەرلىك بايلانىستاردى دامىتۋعا ارنالعان قازاقستان-فرانسيا بيزنەس- فورۋمى ءوتتى.

وندا قازاقستان ەكونوميكاسىنىڭ نەگىزگى سالالارىنا - ەنەرگەتيكا، اگروونەركاسىپ، دەنساۋلىق ساقتاۋ، كولىك ينفراقۇرىلىمى جانە ورنىقتى قالالىق دامۋ باعىتتارىنا فرانسۋز ينۆەستيتسياسىن تارتۋ جانە ارىپتەستىكتى كەڭەيتۋ ماسەلەلەرى تالقىلاندى.

سىرتقى ىستەر ءمينيسترىنىڭ ورىنباسارى الىبەك قۋانتىروۆ قازاقستان مەن فرانسيا اراسىنداعى ينۆەستيتسيالىق جانە ساۋدا-ەكونوميكالىق ءوزارا ءىس-قيمىلدىڭ قارقىندى دامىپ كەلە جاتقانىن اتاپ ءوتتى.

− فرانسيا − قازاقستاننىڭ ەۋروپالىق وداقتاعى باستى ارىپتەستەرىنىڭ ءبىرى. بۇگىندە ەلىمىزدە فرانسۋز كاپيتالىنىڭ قاتىسۋىمەن TotalEnergies ،Orano ،Alstom ،Vicat ،Danone ،Air Liquide سياقتى 170-تەن استام كومپانيا جۇمىس ىستەيدى. فرانسيا قازاقستاننىڭ ەڭ ءىرى 10 ساۋدا سەرىكتەسىنىڭ قاتارىنا كىرەدى جانە ە و ەلدەرى ىشىندە ينۆەستيتسيا كولەمى بويىنشا ءبىرىنشى ورىندا تۇر - سوڭعى جىلدارى بۇل كورسەتكىش $17 ميللياردتان استى. وتكەن جىلى 300 ميلليون دوللار كولەمىندە 6 بىرلەسكەن جوبا جۇزەگە اسىرىلدى، ال ءقازىر 20-دان استام باستاما قارالىپ جاتىر. ءبىز فرانسۋز بيزنەسىنىڭ قازاقستان ەكونوميكاسىنا قوسقان ۇلەسىن جوعارى باعالايمىز جانە ينۆەستورلارعا بارىنشا قولايلى جاعداي جاساۋعا دايىنبىز، − دەدى ۆيتسە-مينيستر فورۋمنىڭ اشىلۋىندا.

فورۋم اياسىندا «ىنتىماقتاستىقتى نىعايتۋ، ءارتاراپتاندىرۋ جانە يننوۆاتسيالار - قازاقستان-فرانسيا قارىم-قاتىناستارىنىڭ دامۋ بولاشاعى» تاقىرىبىندا پلەنارلىق جانە 4 پانەلدىك سەسسيا ءوتتى. بۇل ءۇشىن فرانسيانىڭ Vinci ،Sanofi ،Schneider Electric ،EDF ،Veolia Limagrain ،Egis ،Orano ،Danone ،Air Liquide ،Bonduelle ،Axens ،Richel ،IMV Technologies سياقتى جەتەكشى كومپانيالارىنىڭ باسشىلارى كەلدى.

پانەلدىك سەسسيالار ەنەرگەتيكا مەن كولىك ينفراقۇرىلىمىن دامىتۋ، ازىق-تۇلىك قاۋىپسىزدىگى مەن اگروونەركاسىپتىك ىنتىماقتاستىق، دەنساۋلىق ساقتاۋ جانە بيوتەحنولوگيالار، سونداي-اق ورنىقتى قالالىق دامۋ جانە كوممۋنالدىق قىزمەت كورسەتۋ تاقىرىپتارىنا ارنالدى.

فرانسيالىق سپيكەرلەر قازاقستاندىق نارىققا قىزىعۋشىلىق جوعارى ەكەنىن ايتىپ، باسىم سالالاردا بىرلەسكەن جوبالاردى ىسكە اسىرۋعا دايىن ەكەنىن ءبىلدىردى. ورنىقتى دامۋ، جەرگىلىكتى ءوندىرىستى ارتتىرۋ، تەحنولوگيالار ترانسفەرى جانە ەكى ەل كومپانيالارى اراسىنداعى ىسكەرلىك بايلانىستاردى نىعايتۋ ماسەلەلەرىنە ەرەكشە نازار اۋدارىلدى.

فورۋم قورىتىندىسى رەتىندە ءتۇرلى سالالاردا بىرلەسكەن جوبالاردى ىسكە اسىرۋعا باعىتتالعان كوممەرتسيالىق كەلىسىمدەرگە قول قويىلدى. سونىمەن بىرگە، B2B جانە B2G فورماتتارىندا كەزدەسۋلەر ۇيىمداستىرىلىپ، قاتىسۋشىلار ناقتى باستامالاردى جانە مەملەكەتتەر اراسىنداعى پراكتيكالىق ىنتىماقتاستىقتىڭ كەلەشەگىن تالقىلادى.

ايتا كەتەيىك، ەلوردادا يتاليا-قازاقستان جەتكىزۋ تىزبەگى جونىندەگى حالىقارالىق فورۋمى قاتار ءوتىپ جاتىر.

اۆتور

ايجان سەرىكجان قىزى