قازاقستاندا شىعارىلعان ارماتۋرا قاي ەلدەرگە ەكسپورتتالادى

استانا. KAZINFORM - بيىلعى ءبىرىنشى جارتىجىلدىقتا ەلىمىزدە 510 مىڭ توننا قۇرىلىس ارماتۋراسى وندىرىلگەن.

قازاقستانداعى قۇرىلىس ارماتۋراسىنىڭ نارىعى نەگىزىنەن كومىرتەكتى بولات جانە بولاتتىڭ از قوسپالانعان ونىمدەرىنەن تۇرادى. بۇل ونىمدەر وسى نارىقتىڭ ەڭ دامىعان سەگمەنتىنە جاتادى.

قۇرىلىس ارماتۋراسى تۇرعىن ءۇي، كوممەرتسيالىق جانە وندىرىستىك عيماراتتار قۇرىلىسىندا، كوپىر، جول سياقتى ينفراقۇرىلىم وبەكتىلەرىن سالۋدا قولدانىلادى.

بيىلعى التى ايدا ەلىمىزدەگى قۇرىلىس ارماتۋراسىنىڭ ءوندىرىس كولەمى 510 مىڭ توننا بولدى (2023 -جىلدىڭ دەڭگەيىمەن سالىستىرعاندا 13,5 پايىز ارتتى)، ال ىشكى تۇتىنۋ كولەمى 782 مىڭ تونناعا جەتتى (11,6 پايىز ارتتى).

جەتپەگەن قاجەتتىلىك كولەمى ت م د ەلدەرىنەن الدىرىلدى.

ەسەپتى كەزەڭدە قازاقستاندىق ءونىم تاجىكستان (62) جانە وزبەكستان (22 پايىز) نارىعىنا ەكسپورتتالعان.

قۇرىلىس ارماتۋراسى سەگمەنتىنىڭ ءوسۋ قورى - 431 مىڭ توننا.

قازاقستاندا ارماتۋرانى وندىرەتىن نەگىزگى كاسىپورىندار: Qarmet ا ق (قاراعاندى وبلىسى)، «ەۆرازكاسپيانستال» ج ش س (قوستاناي وبلىسى)، KSP Steel ج ش س جانە «كاستينگ» ج ش س (پاۆلودار وبلىسى)، «تاراز ارماتۋرا زاۋىتى» ج ش س» (جامبىل وبلىسى)، SinYuanSteel, Ferrum-Vtor جانە Shymkent Temir ج ش س (شىمكەنت قالاسى)، Central Asia Fu Zhou Metal ج ش س (الماتى وبلىسى).

بۇل كاسىپورىنداردىڭ جوبالىق جيىنتىق قۋاتى - جىلىنا 1,9 ميلليون توننا.

اۆتور

جانات قاپالبايەۆا