قازاقستاندا شەتەل ازاماتتارىنا تۇرۋعا رۇقسات بەرۋ قاعيدالارى وزگەرەدى

استانا. KAZINFORM - ىشكى ىستەر مينيسترلىگى شەتەل ازاماتتارى مەن ازاماتتىعى جوق ادامدارعا قازاقستان رەسپۋبليكاسىندا ۋاقىتشا جانە تۇراقتى تۇرۋعا رۇقسات بەرۋ قاعيدالارىنا وزگەرىستەر ەنگىزدى. قۇجات جوباسى «اشىق ن ق ا» پورتالىندا جاريالاندى.

ۋاقىتشا تۇرۋعا رۇقسات الۋ ءۇشىن قىزمەت الۋشىلار تىركەلگەن جەرى بويىنشا اۋماقتىق پوليتسيا ورگاندارىنا نەمەسە «ازاماتتارعا ارنالعان ۇكىمەت» مەملەكەتتىك كورپوراتسياسى ارقىلى نە بولماسا ەلەكتروندىق ۇكىمەت پورتالى ارقىلى شەتەلدىككە نەمەسە ازاماتتىعى جوق تۇلعاعا ۋاقىتشا تۇرۋعا رۇقسات بەرۋ تۋرالى ءوتىنىش-ساۋالنامامەن جانە بولۋ ماقساتىنا قاراي قاجەتتى قۇجاتتارمەن جۇگىنەدى.

مەملەكەتتىك قىزمەت كورسەتۋ كەزىندە قىزمەت الۋشىنىڭ ءوزى نەمەسە زاڭدى تۇلعانىڭ وكىلەتتى وكىلى (بۇيرىق نەمەسە سەنىمحات نەگىزىندە) جەكە قاتىسۋى مىندەتتى.

قىزمەت كورسەتۋشىنىڭ ۋاكىلەتتى قىزمەتكەرى قۇجاتتى تۇسكەن كۇنى قابىلداپ، تەكسەرەدى. ەگەر قۇجاتتار تولىق بولماسا، قىزمەتكەر ءوتىنىشتى قابىلداۋدان باس تارتىپ، ءتيىستى قولحات بەرەدى.

سونداي-اق قۇجاتتاردى قابىلداعاننان كەيىن (ونىڭ ىشىندە مەملەكەتتىك كورپوراتسيا نەمەسە پورتال ارقىلى كەلىپ تۇسكەن وتىنىشتەر بويىنشا) قىزمەت كورسەتۋشىنىڭ ۋاكىلەتتى قىزمەتكەرى مىناداي تەكسەرۋلەر جۇرگىزەدى:

ءبىرىڭعاي ەڭبەك شارتتارىن ەسەپكە الۋ جۇيەسىندەگى مالىمەتتەردىڭ جۇمىس بەرۋشى دەرەكتەرىمەن سايكەستىگىن، ونىڭ ىشىندە جۇمىس بەرۋشى مەن قىزمەتكەر اراسىندا ەڭبەك شارتىنىڭ جاسالعانىن؛

ءبىرىڭعاي ەڭبەك شارتتارىن ەسەپكە الۋ جۇيەسىندە كورسەتىلگەن شەتەلدىك قىزمەتكەردىڭ ەڭبەك قىزمەتىن جۇزەگە اسىرۋ نەگىزىنىڭ جۇمىس بەرۋشى ۇسىنعان مالىمەتتەرمەن سايكەستىگىن.

قۇجاتتار قىزمەت كورسەتۋشى نەمەسە «ازاماتتارعا ارنالعان ۇكىمەت» كورپوراتسياسى پورتالى ارقىلى قابىلدانادى:

مەملەكەتتىك قىزمەتتى ۋاقىتىلى الۋ ءۇشىن جۇگىنگەنىمەن، اقپاراتتىق جۇيەلەردەگى اقاۋلار نەمەسە قىزمەت كورسەتۋشى تاراپىنان قاتە باس تارتۋ سالدارىنان بولۋ مەرزىمى ءوتىپ كەتكەن ادامداردان؛

قازاقستان رەسپۋبليكاسىنىڭ زاڭناماسىندا بەلگىلەنگەن مەرزىم وتكەن سوڭ 30 تاۋلىكتەن اسپايتىن مەرزىمدە ەلدەن شىقپاۋى سەبەبىنەن حالىق كوشى-قونى سالاسىندا اكىمشىلىك جاۋاپكەرشىلىككە تارتىلعان تۇلعالاردان؛

16 جاستاعى، ءبىراق كامەلەت جاسىنا تولماعان تۇلعالاردان، ەلەۋسىز قۇقىق بۇزۋشىلىققا بايلانىستى سوت ءىسىن جۇرگىزۋدى توقتاتۋ تۋرالى سوت شەشىمى شىققاننان كەيىن جانە ق ر اكىمشىلىك قۇقىق بۇزۋشىلىقتار كودەكسىنىڭ 517-بابى بويىنشا 30 كۇن ىشىندە ەلدەن شىقپاعانى ءۇشىن اكىمشىلىك جاۋاپكەرشىلىككە تارتىلعانداردان.

قۇجات جوباسى بيىل 14- ماۋسىمعا دەيىن قوعامدىق تالقىلاۋعا ۇسىنىلىپ وتىر.

جىل باسىندا حابارلاعانىمىزداي، ەندى ەلىمىزگە كەلەتىن شەتەل ازاماتتارىنا QR كود بەرىلەدى.

سونداي-اق بيىل ساۋىردە قازاقستان شەتەل ازاماتتارىنا ج س ن (جەكە سايكەستەندىرۋ ءنومىرى) بەرۋدى قايتا باستايتىنى بەلگىلى بولدى.

اۆتور

داۋلەت ىزتىلەۋ