قازاقستاندا پەدوفيلدەر ءومىر بويى باس بوستاندىعىنان ايىرىلادى - زاڭ جوباسى

استانا. KAZINFORM - پارلامەنت ءماجىلىسىنىڭ قاراۋىنا «كەيبىر زاڭنامالىق اكتىلەرگە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەن ىلەسپە قۇجات ەنگىزىلدى. الداعى ۋاقىتتا دەپۋتاتتار وسى قۇجات جوباسىن تالقىلايدى.

«بۇل زاڭ جوبالارى ءماجىلىس دەپۋتاتتارىنىڭ باستاماسىمەن ازىرلەندى. جوبا مەملەكەت باسشىسىنىڭ وتباسىنداعى زورلىق-زومبىلىق ءۇشىن جاۋاپكەرشىلىكتى قاتاڭداتۋ تاپسىرماسىنا تولىعىمەن سايكەس كەلەدى. زاڭ جوباسىندا ءتيىستى نەگىزگى نورمالاردى ۇسىنىپ وتىرمىز. بىرىنشىدەن، ۇرىپ-سوعۋدى جانە دەنساۋلىققا جەڭىل زيان كەلتىرۋدى قازىرگى اكىمشىلىك جاۋاپكەرشىلىكتەن قىلمىستىق جاۋاپكەرشىلىككە جاتقىزۋ جانە دە جازاسىن الدەقايدا قاتاڭداتۋ ەسكەرىلگەن. ەكىنشىدەن، جابىرلەنۋشىنىڭ ءوتىنىشىن كۇتپەي-اق زورلىق-زومبىلىق تۋرالى باق نەمەسە ونلاين پلاتفورمالارداعى اقپارات نەگىزىندە ءتيىستى شارالاردى قابىلداۋ قۇقىعىن بەرۋ قاراستىرىلعان»، - دەدى دەپۋتات اسحات ايماعامبەتوۆ ءماجىلىستىڭ جالپى وتىرىسىندا.

ونىڭ ايتۋىنشا، وتباسىندا زورلىق-زومبىلىق جاساعان ادامداردىڭ اگرەسسيۆتى مىنەز-قۇلىقىن وزگەرتۋ ءۇشىن سوتقا پسيحولوگيالىق كومەك كورسەتۋدى مىندەتتەۋ ۋاكىلەتتىلىگىن بەرۋ ۇسىنىلدى.

«سونىمەن قاتار، پەدوفيلدەردى ءومىر بويى باس بوستاندىعىنان ايىرۋ تۋرالى ارنايى نورما بار. سۋيتسيدتى ناسيحاتتاۋ نەمەسە سۋيتسيدكە يتەرمەلەۋ ءۇشىن قىلمىستىق جاۋاپكەرشىلىك ەنگىزۋ ەسكەرىلگەن. بۇعان قوسا، بالالارعا ارنالعان ينتەرناتتىق ۇيىمداردى الدىن-الا ەسكەرتپەي-اق، كەزكەلگەن ۋاقىتتا ولاردى تەكسەرۋ جانە تاعى باسقا ماڭىزدى نورمالار ۇسىنىلدى. اتالعان زاڭ جوباسى بويىنشا ءماجىلىستىڭ الەۋمەتتىك-مادەني دامۋ كوميتەتى قورىتىندى ازىرلەۋگە دايىن»، - دەدى ءماجىلىس دەپۋتات.

اۆتور

رۋسلان عابباسوۆ