قازاقستاندا ءبىر جىلدا 100 مىڭعا جۋىق بالاعا ارنالعان 109 مەكتەپ اشىلدى
16 -جەلتوقسان قارساڭىندا ەلىمىزدە 7344 ورىندىق 13 جاڭا مەكتەپ اشىلادى. وسىلايشا جىلدىڭ باسىنان بەرى پايدالانۋعا بەرىلەتىن 95344 ورىندىق جاڭا مەكتەپ سانى 109 بولدى، دەپ حابارلايدى Kazinform.
وقۋ- اعارتۋ مينيسترلىگى ءۇش اۋىسىمدى، اپاتتى مەكتەپ ماسەلەسىن، سونداي- اق وقۋشى ورنى تاپشىلىعىن جۇيەلى شەشۋ ءۇشىن جاڭا ءبىلىم نىساندارىن ىسكە قوسۋ بويىنشا جوسپارلى جۇمىس جۇرگىزىپ جاتىر.
جالپى، وسى جىلدىڭ اياعىنا دەيىن ءتۇرلى قارجى كوزدەرىنەن 132 مىڭ وقۋشى ورىنعا ارنالعان 154 مەكتەپتى، ونىڭ ىشىندە ءبىلىم ينفراقۇرىلىمىن قولداۋ قورى ەسەبىنەن 76738 ورىندىق 62 مەكتەپتى پايدالانۋعا بەرۋ جوسپارلانىپ وتىر.
بۇل 12 اپاتتى جانە 29 ءۇش اۋىسىمدى مەكتەپتىڭ ماسەلەسىن، 113 ەلدى مەكەندەگى وقۋشى ورىندارىنىڭ تاپشىلىعىن شەشەدى.
سونداي- اق، «جايلى مەكتەپ» ۇلتتىق جوباسى ىسكە اسۋدا.
بيىل 217 مەكتەپتىڭ قۇرىلىسى باستالدى، ولار 2024 -جىلدىڭ سوڭىنا دەيىن پايدالانۋعا بەرىلەدى.
ۇلتتىق جوبا ەڭ الدىمەن قالالار مەن كەلەشەگى بار ەلدى مەكەندەردە جاڭا ۇلگىدەگى مەكتەپتەردى سالۋعا، وقۋشىلار مەن پەداگوگتەرگە جايلى ءارى قاۋىپسىز ورتا قالىپتاستىرۋعا، ءبىلىم بەرۋ قىزمەتىنىڭ ساپاسىن ارتتىرۋعا باعىتتالعان.
جالپى، مەملەكەت باسشىسىنىڭ تاپسىرماسى بويىنشا ەلىمىزدە 740 مىڭ وقۋشىعا ارنالعان 369 جايلى مەكتەپ سالۋ جوسپارلانىپ وتىر.
اۆتور
جانات قاپالبايەۆا
