قازاقستاندا عالىمدار قانشا جالاقى الادى

استانا. قازاقپارات - Jibek Joly تەلەارناسىنىڭ JJ Talk باعدارلاماسى ەفيرىندە وتاندىق عىلىمنىڭ ەكونوميكاعا پايداسى تالقىلاندى. سونداي- اق عالىمداردىڭ سانى مەن جالاقىسى ءسوز بولدى.

«ەلىمىزدە 22 مىڭداي عالىم بار. ەندى سول كورسەتكىشتى جاس عالىمداردىڭ ارقاسىندا 30 مىڭعا جەتكىزۋدى كوزدەپ وتىرمىز. وسى ورايدا جىلىنا 5 PhD دوكتورىنا ورىن بولمەكشىمىز. بىزدە يدەيا كوپ، قاراجات تا ءبولىنىپ جاتىر. قاراجات بولىنبەگەن كەزدەر بولدى، كەي ۇجىمدار سونىڭ سالدارىنان ساقتالماي قالدى. ايتا كەتەتىن جايت، عىلىمعا قاراجات بولگەنىمەن ونىڭ اسەرى بىردەن بولمايدى. ول ءۇشىن بىرنەشە جىل كەرەك. بۇعان دەيىنگى زاڭ تەك عىلىم تۋرالى بولدى، ەندى تەحنولوگيالىق ساياساتتى ەنگىزىپ جاتىرمىز. ول دەگەنىمىز - عىلىمي جاڭالىقتى وندىرىسكە ەنگىزۋ»، - دەدى عىلىم جانە جوعارى ءبىلىم ۆيتسە- ءمينيسترى دارحان احمەد-زاكي.

ودان بولەك، تەلەباعدارلاما ەفيرىندە جاس عالىمداردىڭ قانشا جالاقى الاتىنى ايتىلدى.

«بىزگە مينيسترلىك قولداۋ كورسەتەدى. سونىڭ ارقاسىندا عالىمداردىڭ جالاقىسى 2 ميلليون تەڭگەگە دەيىن جەتتى. مەنىڭ ايلىعىم - 2 ميلليون 300 مىڭ تەڭگە. ال عىلىمعا ەندى كەلگەن جاس عالىمداردىڭ ايلىعى 300 مىڭ تەڭگەدەن باستالادى. ودان بولەك، تۇرعىن ۇيمەن قامتۋ جاعى بار، تاياۋدا ءبىزدىڭ ينستيتۋتتىڭ 4 قىزمەتكەرى باسپانالى بولدى»، - دەيدى مەتاللۋرگيا جانە كەن بايىتۋ ينستيتۋتىنىڭ باس ديرەكتورى، اكادەميك باقداۋلەت كەنجەعاليەۆ.

بۇعان دەيىن عىلىم جانە جوعارى ءبىلىم ۆيتسە- ءمينيسترى دارحان احمەد- زاكي «ەلىمىزدەگى عىلىمي ينستيتۋتتاردى جابۋ كەرەك پە؟» دەگەن ساۋالعا جاۋاپ بەرگەن ەدى.

اۆتور

داۋلەت ىزتىلەۋ