قازاقستاندا اۆتوتۇراق اقىسىن تولەۋدەن جالتارعانى ءۇشىن ايىپپۇل الىنىپ تاستالماق
استانا. KAZINFORM - قازاقستاندا كولىك تۇراعىنا تولەمنەن جالتارعاندارعا ايىپپۇلدى الىپ تاستاپ، دەنساۋلىققا زيان كەلمەگەن جول-كولىك وقيعاسى ءۇشىن جۇرگىزۋشى كۋالىگىنەن ايىرۋ جازاسىن قولدانباۋ جوسپارلانىپ وتىر.
بۇل نورمالار بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاۋ كەزىندە ءمالىم بولدى.
«ماسەلەن، زاڭ جوباسىندا دەنساۋلىققا زيان كەلتىرمەگەن جول-كولىك وقيعاسىندا جۇرگىزۋشى كۋالىگىنەن ايىرۋدى قولدانباۋ ۇسىنىلعان. اۆتوتۇراق اقىسىن تولەۋدەن جالتارۋ ءۇشىن جاۋاپكەرشىلىك الىنىپ تاستالادى، ويتكەنى بۇل قىزمەتتەر ازاماتتىق-قۇقىقتىق سيپاتتا»، - دەدى ءماجىلىس دەپۋتاتى سەرگەي پوناماريەۆ.
ونىڭ ايتۋىنشا، جۇمىس توبىنىڭ قۇرامىنداعى دەپۋتاتتار اكىمشىلىك زاڭنامانى ودان ءارى جەتىلدىرۋگە جانە ونى باسقا زاڭنامالىق اكتىلەرگە سايكەستەندىرۋگە باعىتتالعان ءبىرقاتار تۇزەتۋ ەنگىزدى.
بۇل تۇرعىدا، قوعامدىق جۇمىستارعا تارتۋ تەتىگىن جەتىلدىرۋ، جازانىڭ وسى ءتۇرىنىڭ ورىندالۋىن قاداعالاۋ ورگاندارىنىڭ جاۋاپكەرشىلىگىن قايتا قاراۋ ۇسىنىلدى.
بۇدان بۇرىن حابارلانعانداي، ءماجىلىس اكىمشىلىك كودەكسكە وزگەرىستەر مەن تولىقتىرۋلار ەنگىزەتىن زاڭ جوباسىن ءبىرىنشى وقىلىمدا ماقۇلدادى.
اۆتور
رۋسلان عابباسوۆ
