قازاقستاندا «اتا-انالار اكادەمياسى» جوباسى ىسكە قوسىلادى
استانا. KAZINFORM - «اتا-انالار اكادەمياسى» جوباسىن جۇزەگە اسىرۋ 2025 -جىلى باستالادى دەپ جوسپارلانعان.
بۇل تۋرالى ەلوردادا بالا تاربيەسى جونىندەگى حالىقارالىق كونفەرەنسيا قاتىسۋشىلارىنا ارنالعان قۇتتىقتاۋ حاتىندا ق ر پرەزيدەنتىنىڭ جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيانىڭ ءتوراعاسى، مادەنيەت جانە اقپارات ءمينيسترى ايدا بالايەۆا ءمالىم ەتتى.
اتاپ ايتقاندا، ءمينيستردىڭ ءسوزىن فورۋمدا ق ر پرەزيدەنتىنىڭ جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيا ءتوراعاسىنىڭ ورىنباسارى ءلاززات سۇلەيمەن وقىپ بەردى.
- تاربيە ماسەلەلەرىنىڭ وزەكتىلىگىن ەسكەرە وتىرىپ، اتا-انالاردىڭ بالا تاربيەلەۋدەگى جاۋاپكەرشىلىگىن ارتتىرۋدىڭ ماڭىزى جوعارى. مادەنيەت جانە اقپارات مينيسترلىگى بىرىككەن ۇلتتار ۇيىمىنىڭ بالالار قورىمەن (يۋنيسەف)، وقۋ-اعارتۋ مينيسترلىگىمەن جانە قازاقستانداعى بالالاردىڭ ءال-اۋقاتىن ارتتىرۋ ينستيتۋتىمەن بىرلەسىپ، 2025 -جىلى «اتا- انالار اكادەمياسى» جوباسىن جۇزەگە اسىرۋدى باستايدى، - دەدى ا. بالايەۆا.
وسى جوبا اياسىندا بالا تاربيەسىندەگى وزىق حالىقارالىق جانە ۇلتتىق تاجىريبە جيناقتالىپ، اتا-انالاردى ۇزدىكسىز اقپاراتتاندىرۋ جانە وقىتۋ ءۇشىن الاڭ قۇرىلادى.
بۇدان بۇرىن حابارلانعانداي، ەلوردادا بالالار مەن جاستار تاربيەسىنە ارنالعان حالىقارالىق كونفەرەنسيا ءوتتى.
سونىمەن قاتار، كونفەرەنسيا بارىسىندا ەلىمىزدە بۇدان بىلاي قامقورشىلىق ورگاندارىنداعى قىزمەتكەرلەردىڭ سانى ەسەلەپ ارتاتىنى ءمالىم بولدى.
شارادا زەرتتەۋ ناتيجەلەرى دە جاريالاندى. سوعان سايكەس 5-8 جاس ارالىعىنداعى قازاقستاندىق بالالاردىڭ 40 پايىزى كۇن سايىن بوس ۋاقىتىن ينتەرنەتتە وتكىزەتىنى بەلگىلى بولدى.
