قازاقستاندا انا قۇرساعىنداعى ۇرىققا وپەراتسيا جۇرگىزىلە باستادى
استانا. KAZINFORM - فەتالدىق (قۇرساقىشىلىك) وپەراتسيالار پەريناتالدىق ناتيجەلەردى جاقسارتۋعا جانە بالالارداعى مۇگەدەكتىكتى ازايتۋعا مۇمكىندىك بەرەدى، دەپ حابارلايدى ق ر دەنساۋلىق ساقتاۋ مينيسترلىگى.
مينيسترلىكتىڭ باسپا ءسوز قىزمەتى تاراتقان اقپاراتقا قاراعاندا، قازاقستاندىق دارىگەرلەر العاش رەت ۇرىقتىڭ پاتولوگياسى مەن دامۋ اقاۋلارىن تۇزەتۋ ارقىلى ۇرىققا وپەراتسيا جاساي باستادى.
ۇرىققا وپەراتسيالار بولاشاق بالانىڭ دەنساۋلىعى مەن ءومىرىن جاقسارتاتىن جاعدايلاردا جاسالادى.
قازاقستان ءۇشىن فەتالدىق حيرۋرگيا - مەديتسينانىڭ جاڭا باعىتى. جوبانى ق ر دەنساۋلىق ساقتاۋ مينيسترلىگى AYALA قايىرىمدىلىق قورىنىڭ قولداۋىمەن ىسكە اسىرۋدا.
مەديتسينا قىزمەتكەرى كۇنى قارساڭىندا الماتى قالاسىنداعى پەريناتولوگيا جانە بالالار كارديوحيرۋرگياسى ورتالىعىندا قازاقستان مەن رەسەيدىڭ جەتەكشى ماماندارىنىڭ قاتىسۋىمەن قازاقستانداعى العاشقى قۇرساقىشىلىك پاتولوگيانى تۇزەتۋ بويىنشا پراكتيكالىق ماستەر- كلاسس ءوتتى.
«دەنساۋلىق ساقتاۋ مينيسترلىگى تۋعاننان باستاپ بالالاردىڭ مۇگەدەكتىگىن تومەندەتۋ جونىندەگى باسىمدىقتى مىندەت دەپ سانايدى. دۇنيەجۇزىندەگى فەتالدىق حيرۋرگيا بۇل ءۇشىن ەڭ ماڭىزدى قۇرالداردىڭ ءبىرى بولىپ سانالادى. ءبىز 30 جىلدىڭ ىشىندە فەتالدىق وپەراتسيالار پراكتيكاسىندا جيناقتالعان الەمدىك تاجىريبەنى تالدادىق. بۇل ءبىلىمنىڭ بارلىعى قازاقستاندا العاش رەت ازىرلەنگەن فەتالدىق حيرۋرگيا باعدارلاماسىنىڭ نەگىزىن قالادى»، - دەپ اتاپ ءوتتى ق ر دەنساۋلىق ساقتاۋ ءمينيسترى اقمارال ءالنازاروۆا.
قازاقستاندا فەتالدىق حيرۋرگيانى ىسكە قوسۋعا دايىندىقتى دەنساۋلىق ساقتاۋ مينيسترلىگى ەكى جىل بويى جۇرگىزدى. پەريناتولوگيا جانە بالالار كارديوحيرۋرگياسى ورتالىعى (الماتى) جانە UMC (استانا) دارىگەرلەرىنىڭ بريگادالارى قازاقستاندا جانە شەتەلدە تەوريالىق جانە پراكتيكالىق دايارلىقتان ءوتتى.
«قازاقستاندا تۋعاننان باستاپ بالالاردىڭ مۇگەدەكتىگىن تومەندەتۋ جونىندەگى مىندەت - AYALA قورى ءۇشىن باستى مىندەت. ءبىز دەنساۋلىق ساقتاۋ مينيسترلىگىنە ەلىمىزدە فەتالدى حيرۋرگياسىن باستاۋعا جانە قالىپتاستىرۋعا كومەكتەسۋگە قۋانىشتىمىز. ءبىز پەريناتولوگيا جانە بالالار حيرۋرگياسى ورتالىعىنداعى فەتالدىق حيرۋرگيا بولىمشەسىن 29,3 ميلليون تەڭگەدەن استام سوماعا ارنايى مەديتسينالىق قۇرالدارمەن - لازەرمەن جانە فەتوسكوپتارمەن جابدىقتادىق»، - دەپ اتاپ ءوتتى AYALA قايىرىمدىلىق قورىنىڭ پرەزيدەنتى ايدانا سۇلەيمەنوۆا.
فەتالدىق مەديتسينا (ۇرىق حيرۋرگياسى) - بۇل انانىڭ قۇرساعىنداعى ۇرىق پاتسيەنت بولىپ تابىلاتىن جوعارى مامانداندىرىلعان مەديتسينا سالاسى. ۇرىق حيرۋرگياسى از ينۆازيۆتى ەم- شارالار ارقىلى ۇرىقتىڭ ەرتە پاتولوگيالىق جاعدايلارىن تۇزەتۋگە جانە ەمدەۋگە مۇمكىندىك بەرەتىن يننوۆاتسيالىق تەحنولوگيالارعا نەگىزدەلگەن.
«ءبىز جىل سايىن قۇرساقىشىلىك اقاۋلاردى تۇزەتۋ بويىنشا 150-گە جۋىق وپەراتسيا جاساۋدى جوسپارلاپ وتىرمىز. فەتالدىق حيرۋرگيا جوباسى ءبىزدىڭ ورتالىقتى دامىتۋدىڭ جانە ەلىمىزدىڭ انالارى مەن بالالارىنا مەديتسينالىق كومەكتىڭ ساپاسىن جاقسارتۋدىڭ جاڭا كەزەڭى بولادى»، - دەپ اتاپ ءوتتى الماتى قالاسى پەريناتولوگيا جانە بالالار كارديوحيرۋرگياسى ورتالىعىنىڭ ديرەكتورى گۇلنار نۇرلانوۆا.
قازىرگى ۋاقىتتا از ينۆازيۆتى ەندوسكوپيالىق (فەتوسكوپيالىق) وپەراتسيالار اشىق حيرۋرگيانى الماستىرۋدا، ويتكەنى ولار انا مەن ۇرىقتىڭ ورگانيزمى ءۇشىن قاۋىپسىز بولىپ تابىلادى. الەمنىڭ كوپتەگەن ەلدەرىندە جىل سايىن قۇرساقىشىلىك تۇزەتۋگە جاتاتىن ۇرىق اۋرۋلارىنىڭ سپەكترى كەڭەيىپ كەلەدى، جاڭا تەحنولوگيالار ازىرلەنۋدە جانە جەتىلدىرىلۋدە، تۋا بىتكەن جۇرەك اقاۋلارى، ديافراگما جارىقتارى جانە و ن ج ءۇشىن قۇرساقىشىلىك ارالاسۋلار بەلسەندى ەنگىزىلۋدە جانە بۇگىنگى كۇنى ولار ۇلكەن جەتىستىكتەرگە جەتتى.
