قازاقستانعا رەسەيدەن قاۋىپتى ۆيرۋسى بار تۇقىم كىرىپ كەتكەن

استانا. KAZINFORM - فيتوسانيتاريالىق قىزمەت رەسەيدەن اكەلىنگەن قىزاناق تۇقىمىنان قاۋىپتى ۆيرۋس تاپتى.

«استانا تەمىر جول» فيتوسانيتاريالىق باقىلاۋ بەكەتتەرى وسىمدىكتەر كارانتينى جونىندەگى مەملەكەتتىك ينسپەكتورلارمەن بىرلەسىپ رەسەي فەدەراتسياسىنىڭ اۋماعىنان اكەلىنگەن 2700 بۋما قىزاناق تۇقىمىنىڭ قاۋىپتى ۆيرۋسپەن زالالدانعانىن انىقتادى. ءونىمدى ەلوردا اۋماعىنا ەنگىزۋگە تىيىم سالىنىپ، «НТП Kazecotech» كومپانياسىنىڭ مامانداندىرىلعان پەشىندە ورتەلدى.

Фото: Астана қаласының агроөнеркәсіп кешеніндегі аумақтық инспекциясы

قىزاناقتىڭ قوڭىر قاتپارلى ۆيرۋسى (توباموۆيرۋس، ToBRFV) تۇقىمداردا ساقتالادى جانە بايلانىس ارقىلى وڭاي تارالادى. بۇل ۆيرۋستىڭ ادام دەنساۋلىعىنا زيانى جوق. الايدا Solanaceae تۇقىمداس بارلىق داقىلداردى زاقىمدايتىن قاۋىپتى پاتوگەن. ۆيرۋس جاپپاي تارالعان جاعدايدا القاپتاعى ءونىم %80- عا دەيىن جويىلۋى مۇمكىن»، - دەيدى استانا قالاسىنىڭ اگروونەركاسىپ كەشەنىندەگى اۋماقتىق ينسپەكسيا باسشىسى سىمبات قالياسقاروۆ.

اتالعان فاكتى بويىنشا ءونىم يەسىنە اكىمشىلىك قۇقىق بۇزۋ تۋرالى كودەكستىڭ 400-بابى 2-بولىگىنىڭ 1-تارماعى نەگىزىندە اكىمشىلىك ءىس قوزعالىپ، 103376 تەڭگە ايىپپۇل سالىندى.

«سونداي-اق، كەنيادا وسىرىلگەن باتىس گۇل تريپسى كارانتيندىك وبەكتىسىمەن زالالدانعان 1320 دانا راۋشان، حريزانتەما جانە گيپسوفيلا گۇل كەسكىندەرى دە ورتەۋ ادىسىمەن جويىلدى. كودەكستىڭ 400-بابى 2-بولىگىنىڭ 1-تارماعى نەگىزىندە اكىمشىلىك ىستەر قوزعالىپ، ءونىم يەسىنە 251056 تەڭگە ايىپپۇل سالىندى»، - دەلىنگەن استانا قالاسى فيتوسانيتاريالىق قىزمەتى تاراتقان مالىمەتتە.

مامانداردىڭ ايتۋىنشا، اتالعان زيانكەس 250-دەن استام وسىمدىك ءتۇرىن زاقىمدايدى. ونىڭ ىشىندە جەمىس-جيدەك، كوكونىس پەن گۇلدەر بار. زيانكەس وسىمدىكتىك جاسۋشا شىرىندارىمەن قورەكتەنەدى، جاپپاي تارالعان كەزدە وسىمدىكتى سولدىرىپ تىنادى. بۇل زيانكەس تە قىزاناقتىڭ قاۋىپتى ۆيرۋستارىن دا تاسىمالداۋشى بولىپ ەسەپتەلەدى.

اۆتور

ەسىمجان ناقتىباي