قازاقستانعا قاي ەلدىڭ ازاماتتارى كوشىپ كەلدى؟
استانا. قازاقپارات - ەلىمىزدە حالىقتى جۇمىسپەن قامتۋ شارالارى شيراپ كەلەدى. ۇلتتىق ستاتيستيكا بيۋروسىنىڭ مالىمەتىنشە، بيىل ەڭبەككە تارتىلعان ازاماتتاردىڭ سانى بىلتىرعى جىلدىڭ العاشقى توقسانىمەن سالىستىرعاندا 134 مىڭ ادامعا كوبەيگەن.
ونىڭ جارتىسىنان كوبى - جالدامالى قىزمەتكەرلەر. جۇمىسپەن قامتىلعانداردىڭ كوبى ساۋدا، ءبىلىم بەرۋ، ونەركاسىپ جانە اۋىل شارۋاشىلىعى سالالارىندا جۇمىس ىستەپ ءجۇر. ەڭبەك نارىعىنداعى احۋال ەلىمىزدىڭ ەڭبەك نارىعىندا 9 ميلليون 600 مىڭنان استام ادام جۇمىسقا جارامدى. ونىڭ %95,3- ءى جۇمىسپەن قامتىلعان. 7 ميلليون ادام جالدامالى ەڭبەكتە بولسا، 2 ميلليون 200 مىڭ ادام ءوزىن-ءوزى جۇمىسپەن قامتىپ وتىر.
بىلتىرعى جىلدىڭ العاشقى توقسانىمەن سالىستىرعاندا بيىل جالدامالى قىزمەتكەرلەردىڭ سانى 81 مىڭ ادامعا، ءوزىن-ءوزى جۇمىسپەن قامتىعانداردىڭ سانى 55 مىڭعا ارتقان. ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، 2024-جىلدىڭ ناۋرىز ايىنىڭ سوڭىندا حالىقتى جۇمىسپەن قامتۋ ورگاندارىنا 68 مىڭنان استام ادام جۇگىنگەن. وسى باعىتتا 32 مىڭعا جۋىق ءىس-شارا وتكىزىلىپ، 6 مىڭعا جۋىق ادام كاسىپتىك وقىتۋعا جىبەرىلگەن. 2023 -جىلدىڭ 1-توقسانىمەن سالىستىرعاندا قازىر جۇمىسسىزدىق دەڭگەيى %0,1 تومەندەپ، %4,7 قۇرادى.
جۇمىسپەن قامتىلعانداردىڭ سانى ارتىپ كەلە جاتسا دا، كەيبىر ماماندىق يەلەرىنىڭ تاپشىلىعى ايقىن بايقالادى. سول سەبەپتى ەڭبەك جانە حالىقتى الەۋمەتتىك قورعاۋ مينيسترلىگى شەتەلدىك ماماندارعا قازاقستاندا تۇراقتى تۇرۋعا مۇمكىندىك بەرەتىن كاسىپتەر ءتىزىمىن جاريالادى. وندا دارىگەرلەر، ІТ ماماندارى مەن ينجەنەرلەرگە سۇرانىستىڭ جوعارى ەكەنىن كورۋگە بولادى.
ناقتىراق ايتساق، تىزىمدە نەيروحيرۋرگ، گەماتولوگ، ونكولوگ، نەونوتولوگ، ەندوكرينولوگ سىندى مامانداندىرىلعان دارىگەرلەر بار. وعان قوسا اۆياتسيا، ورگانيكالىق جانە بەيورگانيكالىق زاتتار تەحنولوگياسى، فارماتسيەۆتيكا جانە وزگە دە جاراتىلىستانۋ باعىتىنداعى ينجەنەرلەر دە قاجەت كورىنەدى. سونداي-اق موبيلدى قوسىمشالار، كومپيۋتەرلىك ويىندار، جاساندى ينتەللەكت، Big Data سەكىلدى سالالارداعى شەتەلدىك ІТ - ماماندارعا قازاقستاندا تۇراقتى تۇرىپ، قىزمەت ەتۋگە بولادى. بۇدان بولەك، ينجەنەريا بويىنشا وقىتۋشىلار مەن گرافيكالىق ديزاينەرلەر دە تىزىمگە ىلىنگەن.
وسى ورايدا ەلىمىزگە قاي ەلدىڭ ازاماتتارى تۇراقتى تۇرۋعا كەلەدى دەگەن سۇراق پايدا بولادى. ۇلتتىق ستاتيستيكا بيۋروسىنىڭ مالىمەتىنشە، 2023-جىلى قازاقستانعا 25 مىڭنان استام شەتەلدىك كەلگەن. بۇل ەلدەن كەتكەندەردەن 9300 ادامعا ارتىق. ال بيىلعى جىلدىڭ العاشقى توقسانىندا ەلىمىزگە سىرتتان 7,5 مىڭ ادام قونىس اۋدارعان. بۇل كوشىپ كەتكەن ادامداردان ەكى ەسە كوپ.
بيىل دا ت م د ەلدەرىنەن كەلگەندەردىڭ ۇلەسى باسىم - %75,6. قازاقستانعا قونىس اۋدارعانداردىڭ كوبى رەسەي فەدەراتسياسىنان كەلگەن - 2309 ادام. ودان سوڭ رەيتينگكە تاياۋداعى كورشى ەلدەر جايعاسقان. وزبەكستاننان 2137، قىتايدان 750، موڭعوليادا 530 ادام كەلگەن.
ەلىمىزدە تۇراقتى تۇرۋعا ۋكراينا، تۇركيا، گەرمانيادان دا ءجۇز كىسىدەن كوشكەن. بۇدان بولەك، ا ق ش، يزرايل، وڭتۇستىك كورەيادان دا كوشىپ كەلگەندەر بار. سىرتتان كەلگەندەردىڭ دەنى الماتى قالاسى، ماڭعىستاۋ مەن الماتى وبلىستارىن تاڭدايدى ەكەن.
24.kz
