قازاقستانعا الەمدىك جانە ايماقتىق ونەركاسىپ الپاۋىتتارى كەلىپ جاتىر - پرەزيدەنت

بيىل ەلىمىزدە جالپى قۇنى 376 ميلليارد تەڭگەنى قۇرايتىن 91 ينۆەستيتسيالىق جوبا جۇزەگە استى. بۇل تۋرالى بۇگىن ەلوردادا «التىن ساپا» جانە «پارىز» سىيلىقتارىنىڭ جەڭىمپازدارىن ماراپاتتاۋ كەزىندە مەملەكەت باسشىسى قاسىم-جومارت توقايەۆ ءمالىم ەتتى، دەپ حابارلايدى Kazinform.

«مەن وبلىستارعا جۇمىس ساپارىمەن ءجيى بارىپ تۇرامىن. بيىل دا بىرنەشە ايماقتا بولدىم. ءار وبلىستا جۇرتشىلىقپەن، سونىڭ ىشىندە بيزنەس وكىلدەرىمەن كەزدەسىپ ءجۇرمىن. ايماقتاردا كوپتەگەن ينۆەستيتسيالىق جوبا جۇزەگە اسىرىلىپ جاتىر. بيىلدىڭ وزىندە ەلىمىز بويىنشا جالپى قۇنى 376 ميلليارد تەڭگەنى قۇرايتىن 91 ينۆەستيتسيالىق جوبا جۇزەگە اسىرىلدى. سونىڭ ارقاسىندا 6 مىڭنان استام تۇراقتى جۇمىس ورنى اشىلدى»، - دەدى قاسىم- جومارت توقايەۆ.

پرەزيدەنت قوسىمشا تۇراقتى جۇمىس ورىندارىن اشۋ جالپى مەملەكەتتىك مىندەت ەكەنىن اتاپ ءوتتى.

«ويتكەنى بۇل جەردە حالىقتى جۇمىسپەن قامتۋ، قوعامداعى ماسىلدىق پسيحولوگيادان ارىلۋ تۋرالى ايتىلىپ وتىر. قازاقستانعا الەمدىك جانە ايماقتىق ونەركاسىپ الپاۋىتتارى كەلىپ جاتىر. مىسالى، جاقىندا قوستانايدا Kia اۆتوكولىكتەرىن شىعاراتىن تولىق سيكلدى زاۋىتتىڭ قۇرىلىسى باستالدى. وزگە دە اۆتوموبيل برەندتەرىن شىعارۋ كوزدەلىپ وتىر. ءبىز الدىمىزعا شىنايى يندۋستريالاندىرۋ جانە ەلدىڭ جاڭا وندىرىستىك نەگىزىن قالىپتاستىرۋ مىندەتىن قويدىق»، - دەدى مەملەكەت باسشىسى.

گەوساياسي تەكەتىرەس جانە مەملەكەتتەر اراسىنداعى باقتالاستىق ۋشىعىپ بارادى.
«مەن وسى القالى جيىندا باسقا دا ءبىرقاتار ماڭىزدى ماسەلەگە ارنايى توقتالعىم كەلەدى. قازىر بۇكىل الەم تۇبەگەيلى بەتبۇرىس كەزەڭىنە قادام باستى. ادامزات اسا كۇردەلى سىن- قاتەرلەرمەن بەتپە- بەت كەلىپ وتىر. گەوساياسي تەكەتىرەس جانە مەملەكەتتەر اراسىنداعى باقتالاستىق ۋشىعىپ بارادى. وسىنداي قۇبىلمالى كەزەڭدە ءبىز ستراتەگيالىق باعدارىمىزعا ساي ارەكەت ەتۋىمىز كەرەك»، - دەدى پرەزيدەنت.

مەملەكەت باسشىسى جان- جاقتى جوسپارلاپ، تياناقتى جاسالعان شارۋا ەرتە مە، كەش پە، جەمىسىن بەرەتىنى ءسوزسىز ەكەندىگىنە نازار اۋدارتتى.

«مىسالى، ءبىز سوڭعى جىلدارى ءبىلىم بەرۋ سالاسىنا باسا ءمان بەرىپ كەلەمىز. ناقتى شەشىمدەر مەن شارالاردىڭ ارقاسىندا مۇعالىم مارتەبەسى الدەقايدا كوتەرىلدى. مەكتەپتەگى ورىن تاپشىلىعىن جويۋ ءۇشىن ارنايى باعدارلاما جۇزەگە اسىرىلۋدا. بيىل جۇزگە جۋىق ءبىلىم وشاعى بوي كوتەردى. قازىرگى تاڭدا وسىنداي اۋقىمدى جۇمىستىڭ ناقتى ناتيجەسى بار. اتاپ ايتقاندا، حالىقارالىق PISA رەيتينگى بويىنشا قازاقستانداعى ورتا ءبىلىمنىڭ ساپاسى ەداۋىر ارتتى. باسقا دا سالالاردا وڭ وزگەرىس بار»، - دەدى قاسىم- جومارت توقايەۆ.
اۆتور
مارلان جيەمباي