قازاقستان يراندىق كومپانيامەن بىرگە پارسى شىعاناعىندا جۇك تەرمينالىن اشادى

استانا. KAZINFORM - يراننىڭ قازاقستانداعى توتەنشە جانە وكىلەتتى ەلشىسى الي اكبار دجوۋكار يران يسلام ريەۆوليۋتسياسىنىڭ 46 جىلدىعىنا وراي ب ا ق وكىلدەرىمەن كەزدەستى. ءىس-شارا بارىسىندا پارسى شىعاناعىندا قازاقستاننىڭ جۇك تەرمينالىن اشۋ جوباسى قاي ساتىدا تۇرعانى ايتىلدى.

Иранның Қазақстандағы Төтенше және Өкілетті Елшісі Али Акбар Джоукар
Фото: Солтан Жексенбеков/ Kazinform

تەرمينال قازاقستانعا نە بەرەدى؟

- قازىرگى جاعدايدا يراندىق جەكە كومپانيانىڭ قاتىسۋىمەن ءوزىڭىز ايتىپ وتىرعان جەر تەلىمىن قازاقستان تارابىمەن بىرلەسىپ يگەرۋ جوباسى پىسىقتالىپ جاتىر. ياعني، باستاپقى كەلىسىمدەر بار. بيىل جۇزەگە اسۋى مۇمكىن.

بۇل جوسپار جۇزەگە اسسا، قازاقستانعا بارلىق جاعىنان ءتيىمدى بولار ەدى. بەندەر- ابباستاعى وكىلدىگى ارقىلى يراننىڭ وڭتۇستىگىندەگى پورتتارعا قول جەتكىزەدى. سول ارقىلى وڭتۇستىك شىعىس ازيا ەلدەرىنە، افريكا ەلدەرىنىڭ، ءۇندىستان مەن پارسى شىعاناعىنداعى ەلدەردىڭ نارىعىنا شىعا الادى. بۇل قازاقستان ءۇشىن تەڭىز جولدارىنا ەركىن شىعاتىن بىردەن ءبىر جول بولادى، - دەيدى الي اكبار دجوۋكار.

باستاما قايدان شىقتى؟

ايتا كەتۋ كەرەك، پرەزيدەنت قاسىم-جومارت توقايەۆتىڭ 2022 -جىلعى يرانعا ساپارى كەزىندە پارسى شىعاناعىنداعى بەندەر-ابباس پورتىندا قازاقستاننىڭ تەرمينالىن سالۋ ءۇشىن 15 گەكتار جەر تەلىمىن بولۋگە كەلىسكەن.

يران ەلشىسى 2023 -جىلى بەرگەن اگەنتتىككە بەرگەن سۇحباتىندا قازاقستان تارابىنان وسى تەرمينالدى قاشان ىسكە قوسىپ، پايدالانا باستايتىنى تۋرالى ءالى جاۋاپ الا الماي وتىرعاندارىن ايتقان.

- ەكى ەل باسشىلارىنىڭ ساياسي جىگەرى مەن تاپسىرمالارىن ءتيىستى دەڭگەيدە ورىنداي الماي وتىرمىز دەدىم عوي. سونىڭ ءبىر فاكتىسى وسى تەرمينال دەۋگە بولادى. بۇگىنگە دەيىن قازاقستاننىڭ مەملەكەتتىك ورگاندارى دا، كۆازيمەملەكەتتىك ورگاندارى دا پرەزيدەنتتەرىڭىزدىڭ وسى تاپسىرماسىنا بايلانىستى ءتيىستى شەشىم قابىلداعان جوق، - دەگەن بولاتىن ديپلومات.

اۆتور

ەسىمجان ناقتىباي

سوڭعى جاڭالىقتار