قازاقستان وزبەكستاننان «دوستىق» كانالى ارقىلى 922 ميلليون تەكشە مەتر سۋ الادى
استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ (م س ش ۇ ك) 86- وتىرىسىنا قاتىستى. وعان قازاقستان، قىرعىزستان، تاجىكستان، تۇرىكمەنستان جانە وزبەكستان كىرەدى.
سۋ رەسۋرستارى جانە يرريگاتسيا مينيسترلىگى باسپا ءسوز قىزمەتىنىڭ مالىمەتىنشە، كەزدەسۋ قورىتىندىسى بويىنشا مينيستر «دوستىق» مەملەكەتارالىق كانالى ارقىلى سۋارۋ ماۋسىمىندا قازاقستانعا 922 ميلليون تەكشە مەتر سۋ بەرۋ تۋرالى كەلىسىمگە كەلدى. بۇل رەتتە تۇركىستان وبلىسىنىڭ شاردارا سۋ قويماسىنا 4,8 ميلليارد تەكشە مەتر سۋ جينالعانىن ايتا كەتكەن ءجون.
ال قازاقستاننىڭ وڭتۇستىگىندەگى ەگىس القاپتارىن سۋارۋ ءۇشىن سۋ الىناتىن توقتوعۇل (قىرعىزستان) سۋ قويماسىنا 8 ميلليارد تەكشە مەتر سۋ جينالدى. سونداي-اق، وتىرىستا وسى جىلدىڭ 30-قىركۇيەگىنە دەيىن نارىن-سىرداريا سۋ قويمالارى كاسكادى جۇمىسىنىڭ بولجامدى كەستەسى بەكىتىلدى.
وتىرىسقا قاتىسۋشىلار جىل باسىنان بەرى ەلىمىز ءتوراعالىق ەتەتىن حالىقارالىق ارالدى قۇتقارۋ قورى اياسىنداعى جۇمىستى جەكە تالقىلادى.
بۇگىنگى كۇنگە قازاقستان تاراپى بارلىق ۇيىمداستىرۋ جۇمىستارىن اياقتادى. سونداي-اق، «ورتالىق ازيا ەلدەرى اراسىندا سۋ- ەنەرگەتيكالىق ىنتىماقتاستىق تەتىگىن قۇرۋ تۋرالى» كەلىسىم جوباسى ازىرلەنىپ جاتىر.
«قازىر ءبىزدىڭ باستى مىندەتىمىز - تاسقىن سۋىن جيناۋ. ءبىز ونى كاسپيي، بالقاش، قامىس- سامار كولدەرىنە، ۇلىتاۋ وبلىسىنان قىزىلوردا وبلىسىنىڭ كولدەرىنە جانە ت. ب. باعىتتايمىز. ءبىراق سونىمەن قاتار وڭتۇستىك وڭىرلەردى دە سۋمەن قامتاماسىز ەتۋ ماڭىزدى. بۇل ماسەلەدە سۋ ديپلوماتياسى وتە ماڭىزدى»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
م س ش ۇ ك- ءنىڭ كەلەسى وتىرىسى وسى جىلدىڭ قىركۇيەك ايىندا تۇركىمەنستاندا وتەدى.
اۆتور
ەلميرا ورالبايەۆا
