قازاقستان تۇركياداعى ءزىلزالادان زارداپ شەككەن اۋدانعا مەكتەپ سالىپ بەرەدى

استانا. قازاقپارات - تۇركيادا جويقىن جەر سىلكىنىسىنەن زارداپ شەككەن اۋدانعا قازاقستان جاڭا مەكتەپ سالىپ بەرەدى. قۇرىلىس «KazAID» قازاقستاندىق حالىقارالىق دامۋ اگەنتتىگى ارقىلى جۇزەگە اسىرىلادى.

ال بۇگىن ءبىلىم ورداسىنىڭ قۇرىلىسى باستالدى. گازيانتەپ پروۆينتسياسى، نۇرداعى قالاسىندا 960 وقۋشىعا ارنالعان مەكتەپ قۇرىلىسىنىڭ ىرگەتاسى قالاندى. بۇل جاي مەكتەپ ەمەس. وسىدان ەكى جىل بۇرىن بولعان جويقىن جەر سىلكىنىسىندە قاتتى زارداپ شەككەن نۇرداعى جۇرتشىلىعىنا باۋىرلاس قازاق حالقىنىڭ تارتۋى.

قازاقستان اتىنان مەكتەپ سالىپ بەرۋ تۋرالى ۇسىنىستى 2023 -جىلى ناۋرىز ايىندا تۇركى مەملەكەتتەرى ۇيىمىنىڭ كەزەكتەن تىس سامميتىندە مەملەكەت باسشىسى قاسىم-جومارت توقايەۆتىڭ ءوزى ايتقان. مىنە، بۇگىن سول ۇسىنىس جۇزەگە اسىپ وتىر. ايتۋلى وقيعاعا بايلانىستى نۇرداعىدا سالتاناتتى شارا ءوتتى. ءبىلىم ورداسىنىڭ ىرگەتاسىن قالاۋ شاراسىنا قازاقستان تاراپىنان تۇركياداعى توتەنشە جانە وكىلەتتى ەلشى ەركەبۇلان ساپيەۆ پەن گازيانتەپ پروۆينتسياسىنىڭ گۋبەرناتورى كەمال چەبەر قاتىستى.

چەبەردىڭ سوزىنشە، بۇل - تەك مەكتەپتىڭ ىرگەتاسى ەمەس قازاق پەن تۇرىك باۋىرلاستىعىنىڭ نىشانى.

كەمال چەبەر، گازيانتەپ پروۆينتسياسىنىڭ گۋبەرناتورى:

- بۇگىن ءبىلىم ورداسىنىڭ ەمەس، باۋىرلاستىقتىڭ ىرگەتاسى تاعى ءبىر رەت قالاندى. وسى كوشەدەن 50-100 جىلدان كەيىن جۇرگەن جەرگىلىكتى تۇرعىندار بۇل مەكتەپتى مەنىڭ باۋىرىم سالىپ بەردى دەپ ماقتانىشپەن ايتادى. باسقا ءبىر ەلدىڭ جاساعانىنان مىڭ ەسە ارتىق. سەبەبى تۋىسقانىمىزدىڭ تارتۋى. ءزىلزالا بولعان ساتتەن باستاپ، قازاق حالقى بىزبەن بىرگە بولدى. وسىندا بارىن جىبەرىپ، اتسالىسقانداردى بىلەمىز. قازىر دە قازاق ۇكىمەتى ءبىزدىڭ قاسىمىزدا. قازاق باۋىرلارىمىزدىڭ بىزبەن بولۋى ۇلكەن قۋانىش.

مەكتەپ قۇرىلىسىن تولىقتاي قازاقستان قارجىلاندىرىپ، وتاندىق كومپانيا سالادى. جوبانىڭ جالپى قۇنى 6 ميلليارد تەڭگە. مەكتەپتىڭ اۋدانى 7 مىڭنان استام شارشى مەتر. ەكى بلوكتان قۇرالعان وقۋ ورداسىندا 36 سىنىپ بار. ونىڭ 32- ءسى باستاۋىش، 4-ەۋى مەكتەپكە دەيىنگى ءبىلىم بەرۋ سىنىبى. 3 جانە 4 قاباتتىق مەكتەپتە دەنە شىنىقتىرۋ زالى، امفيتەاتر، اسحانا بار. سونداي-اق بەينەلەۋ-ونەر سىنىپتارى، مۋزىكا سىنىپتارى جانە عىلىمي زەرتحانالار قامتىلعان. ءتىپتى مۇمكىندىگى شەكتەۋلى جاندار ءۇشىن قولجەتىمدىلىك پەن ارنايى سىنىپتار قاراستىرىلعان. بۇدان بولەك، مەكتەپ عيماراتىنىڭ جانىندا قازاقستاننىڭ مادەني سيمۆولى رەتىندە كيىز ءۇي بەينەسىندەگى بالالارعا ارنالعان شەبەرحانالار بوي كوتەرمەك.

ەردەنەر گۇنتۋعان، قۇرىلىس جوباسىنىڭ ديرەكتورى:

- مەكتەپ جوباسىن تۇركيا تاراپى جاساعان. قارجىلاندىرۋ جانە قۇرىلىستى جۇرگىزۋ تۇگەل قازاقستان تاراپىنان. مەكتەپ 9 بالدىق جەر سىلكىنىسىنە توتەپ بەرۋ مۇمكىندىگىنە يە. فۋندامەنتىنىڭ ءوزى 6 مەتر تەرەڭدىكتە جاتىر. الدىن الا مەكتەپ ورنىندا زەرتتەۋ جۇرگىزىلدى. بارلىق قۇرىلىس ماتەريالدارى ىقتيمال ءزىلزالاعا ارنالعان. سونىڭ ىشىندە تەمىر قالىڭدىعى، بەتون مەن باسقا دا ماتەريالدار ارنايى تاڭدالعان.

مەكتەپتىڭ سالىنۋى جونىندە حاباردى ەستىگەن جەرگىلىكتى تۇرعىندار ءدان ريزا. ويتكەنى تاپ قازىر قالاعا ەڭ قاجەتتىسى ۇزدىكسىز ءبىلىمنىڭ جالعاسۋى.

ەردال كىلىنچ، نۇرداعى ءبىلىم ءبولىمى باسقارماسى باسشىسى - الدىمەن قازاقستان پرەزيدەنتى مەن حالقىنا العىس ايتامىز. نۇرداعىدا جەر سىلكىنىسىندە 16 مەكتەبىمىز قيرادى. ۇكىمەتىمىزدىڭ جانە باۋىرلاس مەملەكەتتەردىڭ قولداۋىمەن ءبىلىم بەرۋدى بۇرىنعىدان دا جاقسى جاعدايعا كەلتىردىك. بۇگىن ىرتەتاسى قالانعان مەكتەپ سولاردىڭ ىشىندە ەڭ ۇزدىگى. مەكتەپتىڭ تەحنيكالىق ينفراقۇرىلىمى تولىق جابدىقتالعان. عيمارات عانا ەمەس، ىشىندە بارلىق جاعداي الدىن الا جوسپارلانعان زاماناۋي ءبىلىم ورداسى بولماق. بۇل دا قازاق حالقىنىڭ مەيرىمدىلىگىنىڭ دالەلى.

ديلەك ناز اكچاداع، جەرگىلىكتى تۇرعىن:

- قازىر بىزگە ەڭ قاجەتتىسى مەكتەپ. باۋىرلارىم كونتەينەر سىنىپتاردا وقىپ ءجۇر. قاۋىپسىزدىك تە ماڭىزدى. جەرگىلىكتى تۇرعىن رەتىندە قۋانىشتىمىز. قازاقستانعا العىسىمىز شەكسىز.

قازاقستاندىق قۇتقارۋشىلار تەر توككەن جەردە مەكتەپتىڭ بوي كوتەرۋى بەكەر ەمەس. بولاشاقتا وسى ءبىلىم ورداسىنان ۇشقان تۇلەكتەر قازاق-تۇرىك قاتىناسىن تەرەڭدەتۋگە ىقپال ەتەرى ءسوزسىز. ايتا كەتكەن ءجون، مەكتەپ 2026 -جىلدىڭ 15-قاڭتارىندا العاشقى شاكىرتتەرىن قابىلدايدى.

24.kz