قازاقستان ەت ونىمدەرىن وتكىزەتىن جاڭا نارىقتارعا شىعادى
استانا. KAZINFORM - قازاقستاننان رەسەيگە جانە قىتايعا ەت ەكسپورتتاۋ كولەمى ارتادى.
«ستاتيستيكاعا سەنسەك، 2023-جىلى ەت ەكسپورتى 24,4 مىڭ توننانى قۇراعان، ونىڭ ىشىندە سيىر ەتى - 15,8 مىڭ توننا، قوي ەتى - 7,8 مىڭ توننا. وتاندىق ەت ەكسپورتىنىڭ نەگىزگى باعىتتارى - وزبەكستان، ب ا ءا، قىرعىزستان، يران، كۋۆەيت. 2023-جىلى 2022-جىلمەن سالىستىرعاندا قۇس ەتى ەكسپورتىنىڭ 13,7 مىڭ توننادان 31,5 مىڭ تونناعا دەيىن وسكەنى بايقالدى. ەكسپورتتىڭ نەگىزگى باعىتتارى - رەسەي، قىرعىزستان، وزبەكستان، بەلارۋس، تاجىكستان. قازىر قازاقستاندىق ەت جانە ەت ونىمدەرىن وندىرۋشىلەر ءوز ونىمدەرىن ە ا ە و، ت م د ەلدەرىنىڭ اۋماعىنا، سونداي-اق پارسى شىعاناعى ەلدەرىنە، قىتايعا، جاپونياعا ەكسپورتتاۋ مۇمكىندىگىنە يە»، - دەلىنگەن اۋىل شارۋاشىلىعى مينيسترلىگىنىڭ Kazinform اگەنتتىگىنە بەرگەن جاۋابىندا.
ۆەدومستۆو مالىمەتىنە قاراعاندا، جاقىن ارادا ەت ونىمدەرىن وتكىزەتىن جاڭا نارىقتار پايدا بولادى.
«قازاقستاننىڭ مال شارۋاشىلىعى ونىمدەرىن وتكىزۋدىڭ جاڭا نارىقتارىن اشۋ ءۇشىن مىنا باعىتتاردا ۆەتەرينارلىق تالاپتاردى كەلىسۋ بويىنشا جۇمىس اتقارىلىپ جاتىر: سينگاپۋر، ۆەتنام، مالايزيا، گونكونگ. سونداي- اق، 2024 -جىلعى 15-قاڭتاردان باستاپ رەسەيگە ەت ەكسپورتى قالپىنا كەلدى، بۇل ەكى ەلدىڭ اۋىل شارۋاشىلىعى مينيسترلىكتەرى اراسىندا قول جەتكەن كەلىسسوزدىڭ ناتيجەسى بويىنشا مۇمكىن بولدى»، - دەپ اتالىپ وتكەن مينيسترلىك اقپاراتىندا.
اتاپ ايتقاندا، رەسەيگە مىنا ونىمدەر ەكسپورتتالادى: سيىر ەتى، قوي ەتى، شوشقا ەتى، ءسۇت جانە ءسۇت ونىمدەرى، سونداي-اق ەت ونىمدەرى.
«بۇدان باسقا، 2024-جىلعى 7-اقپاننان باستاپ قازاقستاننان قىتايعا قۇس شارۋاشىلىعى ونىمدەرىن اكەلۋگە شەكتەۋلەر جانە اۋسىل بويىنشا بۇرىن قولدانىستا بولعان شەكتەۋلەر الىنىپ تاستالدى. قۇس شارۋاشىلىعى ونىمدەرىن اكەلۋگە تىيىم سالۋ 2005 -جىلدان باستاپ سوزىلدى، ال اۋسىل بويىنشا شەكتەۋلەر 2022-جىلى ەنگىزىلدى. شەكتەۋدى الىپ تاستاۋ ەلىمىزدىڭ وڭتۇستىك-شىعىس وڭىرلەرىنەن قىتايعا مۇزداتىلعان سيىر جانە شوشقا ەتىن، سونداي-اق قۇس شارۋاشىلىعى ونىمدەرىنىڭ كەڭ اۋقىمىن ەكسپورتتاۋدى جاڭعىرتۋعا مۇمكىندىك بەرەدى. ايتا كەتۋ كەرەك، ەندى قازاقستان ەكسپورتتىق تاۋارلار جەلىسىن كەڭەيتۋ بويىنشا ۆەتەرينارلىق تالاپتاردى كەلىسۋ ءراسىمىن، سونداي-اق قازاقستاننىڭ بارلىق اۋماعىنان كاسىپورىندارعا ەكسپورتتاۋعا رۇقسات بەرۋ بويىنشا جۇمىستى باستاي الادى»، - دەلىنگەن ق ر ا ش م مالىمەتىندە.
اۆتور
رۋسلان عابباسوۆ
