قازاقستان ساۋد ارابياسىمەن يننوۆاتسيالىق حاب اشپاق

قازاقستان ساۋد ارابياسىنىڭ استاناسى ەر- ريادتا ستارتاپتارعا ارنالعان يننوۆاتسيالىق حاب اشادى. بۇل تۋرالى ق ر سيفرلىق دامۋ، يننوۆاتسيا جانە ايەروعارىش ونەركاسىبى ۆيتسە- ءمينيسترى قانىش تولەۋشين قازاقستان مەن ساۋد ارابياسى اراسىندا ۇكىمەتارالىق كوميسسيا وتىرىسى كەزىندە ءمالىم ەتتى، دەپ حابارلايدى Kazinform ءتىلشىسى.

ۆيتسە- ءمينيستردىڭ ايتۋىنشا، قازاقستان ورتاق يننوۆاتسيالىق حاب قۇرۋ باستاماسىن كوتەردى. ول وتاندىق ستارتاپشىلار مەن تەحنولوگيالىق كومانيالارعا ساۋد ارابياسىندا عانا ەمەس، تاياۋ شىعىس، سولتۇستىك افريكادا كەڭسەسىن اشىپ، شەكاراسىن كەڭەيتۋگە مۇمكىندىك بەرەدى.

- سول نارىقتا ستارتاپتارىمىزدى دامىتۋ بويىنشا اكسەلەراتسيالىق باعدارلامالارمەن قاتار، وپەراتسيالىق مۇمكىندىكتەرىن كەڭەيتۋ ءۇشىن ينۆەستيتسيالىق كاپيتال تارتۋ مۇمكىندىگى اشىلادى. قۋانىشىمىزعا وراي، جاساندى ينتەللەكت سالاسىنداعى كوپتەگەن كومپانيالارىمىز ساۋد ارابياسىندا جۇمىس ىستەپ جاتىر. مەديتسينالىق تەحنولوگيالارمەن اينالىساتىن كومپانيالار دا بار، - دەدى قانىش تولەۋشين.

يننوۆاتسيالىق حاب 2024 -جىلعى قاڭتاردا جۇمىسىن باستايدى. حاب قۇرۋدا ساۋد ارابياسى سيفرلىق دامۋ ۆەدومستۆوسىنداعى سيفرلىق كاسىپكەرلىك ورتالىعى سەرىكتەس بولادى.

- بىزدە وسى جوباعا ينۆەستيتسيا قۇيۋدى شەشكەن جەكە سەكتور بار. وسىعان ۇقساس حاب كرەمني القابىندا دا اشىلدى. ول جاقتا 24 ستارتاپ بەلسەندى جۇمىس ىستەپ جاتىر، بىرەۋى 1 ميلليون دوللاردان استام قارجى تارتتى، - دەپ تولىقتىردى ق ر ۆيتسە- ءمينيسترى.

اۆتور

بالنۇر قوجاگەلدى