قازاقستان سۋ تاسقىنىنىڭ الدىن الۋ ءۇشىن گوللاند جانە نەمىس تەحنولوگياسىن قولدانادى

استانا. KAZINFORM - سۋ رەسۋرستارى جانە يرريگاتسيا مينيسترلىگى سۋ تاسقىنىن بولجاۋ جانە مودەلدەۋ بويىنشا وزىق حالىقارالىق تاجىريبەلەردى زەرتتەپ جاتىر.

سۋ رەسۋرستارى جانە يرريگاتسيا مينيسترلىگى وزىق حالىقارالىق تاجىريبەلەردىڭ نەگىزىندە سۋ تاسقىنىن تالداۋ، بولجاۋ جانە مودەلدەۋدىڭ​ سيفرلىق شەشىمدەرىن بەيىمدەۋ بويىنشا جۇمىس اتقارۋدا.

مينيسترلىك دامىعان مەملەكەتتەردىڭ تاجىريبەسىن زەرتتەۋ ارقىلى TALSIM (گەرمانيا) جانە Delft-FEWS (نيدەرلاند) جۇيەلەرىن تاڭداپ الدى.

سۋ تاسقىنىن بولجاۋدىڭ تيىمدىلىگى مەن دالدىگىن ارتتىرۋ ءۇشىن اتالعان ادىستەردى ءبىرىڭعاي جۇيەگە بىرىكتىرۋ جوسپارلانىپ وتىر.

اتالعان جۇيە گيدرولوگيالىق جانە بۇلت، ىلعالدىلىق، جاۋىن-شاشىن سەكىلدى اۋا-رايى دەرەكتەرىنىڭ نەگىزىندە ساراپتاما جاسايدى.

قازىرگى ۋاقىتتا جۇيەگە ەسىل وزەنى باسسەينىنىڭ دەرەكتەرى ەنگىزىلىپ جاتىر.

ايتا كەتۋ كەرەك، الداعى ۋاقىتتا ەلىمىزگە نيدەرلاندتان جۇيەنى ازىرلەۋشى ماماندار كەلەدى.

ولار قازاقستاندىق ماماندارمەن بىرگە ءوڭىردىڭ ەرەكشەلىگى مەن سۇرانىسىن ەسكەرە وتىرىپ، جۇيەنى جەرگىلىكتى جاعدايعا بەيىمدەۋ مۇمكىندىكتەرىن پىسىقتايدى.

«جۇيەنى ازىرلەۋ بارىسىندا ءبىز سۋ تاسقىنىن بولجاۋ جانە الدىن الۋ باعىتىندا تاجىريبەسى مول مەملەكەتتەردى زەرتتەدىك. وسىلايشا، گەرمانيالىق TALSIM جانە نيدەرلاندتىق Delft-FEWS جۇيەلەرىن پايدالانىپ، سۋ تاسقىنىن بولجاۋ جانە مودەلدەۋدىڭ سيفرلىق بالاما قۇرالى رەتىندە پيلوتتىق رەجيمدە ەنگىزۋ جونىندە شەشىم قابىلدادىق. وسى شەشىمدەردى پايدالانۋ - سۋ تاسقىنىن بولجاۋ جانە الدىن الۋ مۇمكىندىگىن ارتتىرۋداعى ماڭىزدى قادام»، - دەيدى سۋ رەسۋرستارى جانە يرريگاتسيا ۆيتسە- ءمينيسترى اسلان ابدرايموۆ.

اۆتور

جانات قاپالبايەۆا