قازاقستان ەۋروپا قايتا قۇرۋ بانكىنەن سۋ سالاسىنا قارىز الىپ، دۇرىس يگەرمەي وتىر - اۋديت

ەۋروپا قايتا قۇرۋ جانە دامۋ بانكىنەن الىنعان 3 ميلليارد تەڭگە قارىزعا ساتىپ الىنعان قوندىرعىلار مەن عيماراتتار ماقساتىنا ساي قولدانىلىپ جاتقان جوق.

ماجىلىستە سۋ رەسۋرستارىنىڭ باسقارىلۋ تيىمدىلىگىنە جۇرگىزىلگەن اۋديتورلىق ءىس-شارالاردىڭ قورىتىندىسىن تانىستىرعان جوعارى اۋديتورلىق پالاتانىڭ ءتورايىمى ناتاليا گودۋنوۆا وسىنداي دەرەك ايتتى، دەپ حابارلايدى Kazinform.

«اۋديت كەزىندە انىقتالعانداي، ەۋروپا قايتا قۇرۋ جانە دامۋ بانكىنەن الىنعان بورىشتىڭ 8 جوباسى اياسىندا 3 ميلليارد تەڭگەگە ساتىپ الىنعان قوندىرعىلار مەن عيماراتتار ماقساتىنا ساي قولدانىلىپ وتىرعان جوق. سالدارىنان 4 مىڭ گەكتارعا جۋىق سۋارمالى القاپ اۋىل شارۋاشىلىعى اينالىمىنا تۇسكەن جوق»، - دەدى ن. گودۋنوۆا.

جوعارى اۋديتورلىق پالاتا باسشىسى اتالمىش بانكتەن الىنعان بورىشتىڭ ماقساتىنا ساي قولدانىلماي جاتقانىنا ءبىر مىسال كەلتىردى.

«مۇنى قۇنى 1,5 ميلليارد تەڭگە بولاتىن، «اقتوبە قالاسىندا اقتوبە سۋ قويماسىنان سازدى وزەنىنىڭ ارناسىنا سۋ الۋ ارقىلى جاسىل ايماق قۇرۋ» جوباسىنان كورۋگە بولادى.

بۇل قارىز سۋارۋ ينفراقۇرىلىمىن قالپىنا كەلتىرۋگە باعىتتالعان بولاتىن. ال ءىس جۇزىندە اقتوبە ساياباق ايماعىن اباتتاندىرۋعا جۇمسالعان. ساياباق قۇرۋ كەرەك، ارينە. ءبىراق ۆاليۋتامەن الىنعان قارىز ەسەبىنەن ەمەس شىعار»، - دەدى ناتاليا گودۋنوۆا.

اۆتور

ەسىمجان ناقتىباي