قازاقستان رەسەيگە 106 تاۋار ءتۇرىن شىعارۋدى شەكتەدى

сауда
Фото: Фото: pixabay.com

بۇگىن سەناتتىڭ جالپى وتىرىسىنان كەيىن تىلشىلەر ساۋدا جانە ينتەگراتسيا ۆيتسە- ءمينيسترى قايرات تورەبايەۆتان رەسەي مەن ۋكراينا قاقتىعىسى باستالعالى قازاقستان ر ف اۋماعىنا قانداي تاۋارلار ەكسپورتىن توقتاتقانىن سۇرادى، دەپ حابارلايدى Кazinform.

«جالپى، ءبىز بارلىق تاۋاردى ەكسپورتقا شىعارىپ جاتىرمىز. تەك رەسەيگە سوعىسقا قاتىستى ەكسپورتتىق تاۋارلاردى شەكتەدىك. بۇل تىزىمگە 106 ءتۇرلى تاۋار ەندى. ءبىز ولار بويىنشا ەكسپورتقا مۇلدەم تىيىم سالدىق»، - دەدى ق. تورەبايەۆ.

بۇل تۇرعىدا ۆيتسە- مينيستر اتالعان ونىمدەردىڭ اراسىندا قاقتىعىس كەزىندە قارۋدىڭ بولشەگى رەتىندە پايدالانۋعا بولاتىن تاۋارلار شەكتەلگەنىن ناقتىلادى.

«ولار سوعىسقا قاتىستى تاۋارلار. وسى ونىمدەر رەسەيگە شىعارىلمايدى. سونىڭ اراسىندا قاقتىعىس كەزىندە قولدانىلاتىن دروندار، ارنايى ەلەكترونيكا، چيپتەر جانە باسقا دا قۇرىلعىلار بار»، - دەدى مينيسترلىك وكىلى.

ونىڭ سوزىنە قاراعاندا، اتالعان 106 تاۋار قازاقستاندا وندىرىلمەيدى. بۇرىندارى بۇل ونىمدەر ەلىمىزدىڭ اۋماعى ارقىلى ەكسپورتقا شىعارىلعان ەدى. قازىر وسى تاۋارلار ەلىمىزگە يمپورتتالعانىمەن، رەسەيگە شىعارىلمايدى.

بۇدان بۇرىن حابارلانعانداي، بيىل مامىر ايىندا پرەمەر- ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ قازاقستان قايتالاما سانكسيالارعا جول بەرىلمەيتىنىن ايتتى.

اۆتور

رۋسلان عابباسوۆ

سوڭعى جاڭالىقتار