قازاقستان-قىتاي قۇبىرى 275 ميلليون توننا مۇناي تاسىمالدادى
استانا. قازاقپارات - «قازاقستان-قىتاي قۇبىرى» جاۋاپكەرشىلىگى شەكتەۋلى سەرىكتەستىگى 20 جىل ىشىندە اتقارىلعان جۇمىس ناتيجەسىن جاريالادى.
كومپانيا 2004-2005 -جىلدارى ماگيسترالدى مۇناي قۇبىرلارى قۇرىلىسىنا العان نەسيەسىن مەرزىمنەن بۇرىن وتەپ، مەملەكەت بيۋدجەتىنە 123 ميلليارد تەڭگە سالىق تولەدى. وسىلايشا ولار قازاقستاننىڭ ەكونوميكاسىنا زور ۇلەس قوسىپ وتىر. «قازاقستان-قىتاي قۇبىرى» ج ش س - «اتاسۋ - الاشانكوۋ» جانە «كەڭقياق - قۇمكول» مۇناي قۇبىرلارىن جوبالاۋ، سالۋ جانە پايدالانۋ ماقساتىندا قۇرىلعان.
سەرىكتەستىك 2004 -جىلعى 17- مامىرداعى قازاقستان ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى مۇناي جانە گاز سالاسىندا جان-جاقتى ىنتىماقتاستىقتى دامىتۋ تۋرالى كەلىسىمگە سايكەس قۇرىلدى. جوباعا «قازترانسويل» ا ق مەن قىتاي ۇلتتىق مۇناي جانە گازدى بارلاۋ جانە يگەرۋ كورپوراتسياسى (CNODC) باسشىلىق ەتتى. بۇگىندە قارقىندى دامىپ كەلە جاتقان كومپانيا اتاسۋ - الاشانكوۋ جانە كەڭقياق- قۇمكول ماگيسترالدىق مۇناي قۇبىرلارىنا يەلىك ەتەدى.
تالعات قۇرمانبايەۆ، «قازاقستان-قىتاي قۇبىرى» ج ش س باس ديرەكتوردىڭ ءبىرىنشى ورىنباسارى:
- كومپانيامىز مۇنايدى ەكسپورتقا، ىشكى نارىققا جانە ترانزيت جونىندە تاسىمالدايدى. بۇگىنگى تاڭدا بارلىعى 275 ميلليون تونناعا جۋىق مۇناي تاسىمالداندى. سونىمەن قاتار ءبىزدىڭ كومپانيا جىل سايىن جوعارى قارجىلىق ناتيجەلەرىن كورسەتىپ كەلەدى. وسىعان بايلانىستى ءبىزدىڭ كومپانيا سالىق رەتىندە مەملەكەتتىڭ بيۋدجەتىنە 123 ميلليارد تەڭگەدەن استام تولەگەن. مۇنايدى تاسىمالداۋ كەزىندە ەكسپورتقا بولسىن، ترانزيتكە بولسىن، ىشكى نارىققا بولسىن رەسپۋبليكامىزدىڭ بارلىق مۇددەلەرى ساقتالىپ كەلەدى. ءبىزدىڭ كومپانيانىڭ جوعارى ناتيجەلەرى ءبىزدىڭ ەلىمىزدىڭ يگىلىگى ءۇشىن.
«قازاقستان- قىتاي قۇبىرى» ج ش س ماقساتى - وندىرىستىك نىسانداردىڭ اپاتسىز جۇمىس ىستەۋىن قامتاماسىز ەتىپ، قىزمەتكەرلەردىڭ ءومىرى مەن دەنساۋلىعىن ساقتاۋ. ءوندىرىستىڭ ونىمىدىلىگىن ارتتىرا وتىرىپ، ەلىمىزدەگى ۇزدىك كاسىپورىندارىنىڭ قاتارىندا بولۋ.
24.kz
