قازاقستان قوقىس جويۋدىڭ ابدەن ەسكىرگەن ءادىسىن قولدانادى

قازاقستاندا جىل سايىن 4,5 ميلليون توننادان استام قاتتى تۇرمىستىق قالدىقتار جينالادى. بۇل جونىندە ق ر پرەمەر- ءمينيسترى ءاليحان سمايىلوۆ ۇكىمەت وتىرىسىن وتكىزدى، دەپ حابارلايدى قازاقپارات ءتىلشىسى.

полигон
Фото: pixabay.com

«الەمنىڭ كوپتەگەن ەلدەرى قالدىقتاردى قايتا وڭدەپ، ۋتيليزاتسيا جاساۋدا. ءتيىستى ينفراقۇرىلىم جاسالىپ، حالىقتىڭ قالدىقتارمەن جۇمىس ىستەۋ مادەنيەتى قالىپتاسقان. بۇل ەۋروپا ەلدەرىنە قالدىقتاردى وڭدەۋ كورسەتكىشىن % 50- كە جەتكىزۋگە مۇمكىندىك بەردى. بۇگىندە شۆەتسيا تۇرمىستىق قالدىقتاردىڭ % 99- ءىن قايتا وڭدەپ، پايداعا جاراتىپ وتىر. ال ءبىز ءالى كۇنگە دەيىن قوقىستى جويۋدىڭ جيناقتاۋ نەمەسە كومۋ سياقتى ابدەن ەسكىرگەن ءادىسىن قولدانىپ كەلەمىز»، - دەدى ءاليحان سمايىلوۆ ۇكىمەت وتىرىسىندا.

پرەمەر- ءمينيستردىڭ ايتۋىنشا، جىل سايىن قازاقستاندا 4,5 ميلليون توننادان استام قاتتى تۇرمىستىق قالدىقتار پايدا بولادى. مىڭداعان ستيحيالىق قوقىس پوليگوندارىن جويۋ ءۇشىن اكىمدىكتەر قوماقتى بيۋدجەت قاراجاتىن بولەدى. قالدىقتاردى زاڭسىز تاسىمالداۋ جانە جيناقتاۋ فاكتىلەرىن انىقتاۋعا ارنالعان رەيدتىك ءىس- شارالار جۇرگىزىلەدى. زاڭ تالاپتارىن بۇزعانى ءۇشىن سالىناتىن ايىپپۇل مولشەرى دە ۇلعايتىلدى.

«الايدا، اتقارىلىپ جاتقان شارالار جەتكىلىكسىز. قالدىقتاردى باسقارۋ سالاسىنداعى قازىرگى احۋال وتە كۇردەلى كۇيىندە قالىپ وتىر. وسى كۇنگە دەيىن زاماناۋي قوقىس وڭدەۋ زاۋىتتارى ىسكە قوسىلعان جوق. وكىنىشكە قاراي، بىزدە قالدىقتارمەن جۇمىس ىستەۋ مادەنيەتى قالىپتاسپادى. كوپ جاعدايدا قوقىستى كوشەگە تاستاي سالۋ ادەتكە اينالعان. قوقىس ۇيىندىلەرىنە قاتىستى اۋىلدارداعى جاعداي بۇدان دا كۇردەلى. 2022 -جىلعى عارىشتىق مونيتورينگ ناتيجەلەرى بويىنشا ەلدە 5,6 مىڭنان استام ستيحيالىق قوقىس ۇيىندىلەرى انىقتالدى. بيىلعى ناۋرىزدان قىركۇيەككە دەيىنگى ارالىقتا 5,5 مىڭ رۇقسات ەتىلمەگەن قوقىس ورنى تابىلدى»، - دەدى ۇكىمەت باسشىسى.

بۇل رەتتە پرەمەر- مينيستر اكىمشىلىك ايىپپۇلدار جاعدايدى جاقسارتپايتىنىن، پوليگونعا قوقىس تاستاعاننان كورى ايىپپۇل تولەۋ ارزانىراق ەكەنىن ايتتى.

«بۇل ءادىستى وزگەرتىپ، قالدىقتاردى وڭدەۋ مەن كادەگە جاراتۋدىڭ ناقتى جۇيەسىن قۇرۋ قاجەت. جەرگىلىكتى اتقارۋشى ورگاندار ءتيىستى اقپاراتتىق جۇمىس جۇرگىزبەيدى. مىسالى، قۇرىلىس قالدىقتارى پوليگوندارى جونىندە كوپ ادام بىلە بەرمەيدى. قالدىقتاردى بولەك جيناۋدى، ودان ءارى سۇرىپتاۋدى، قايتا وڭدەۋدى جانە كادەگە جاراتۋدى بەلسەندى ەنگىزۋ قاجەت. ساراپشىلاردىڭ پىكىرىنشە، قازاقستاندا قالدىقتارعا ارنالعان پوليگون ۇيىمداستىرۋداعى باستى پروبلەما - تاريفتەر، تالاپتار مەن نورمالار بولىپ وتىر. ولاردى يكەمدى ەتۋ كەرەك»، - دەدى ءا. سمايىلوۆ.

بۇعان دەيىن ەكولوگيا جانە تابيعي رەسۋرستار ءمينيسترى ەرلان نىسانبايەۆ قازاقستاننىڭ قاي وڭىرىندە قوقىس ءۇيىندىسى كوپ ەكەنىن بايانداعان ەدى.

سوڭعى جاڭالىقتار