قازاقستان قاشان اق قارعا ورانادى

جەلتوقسان ايىنىڭ العاشقى ونكۇندىگىندە ەلىمىزدىڭ باسىم بولىگىن قار باسادى. مۇنداي بولجامدى «قازگيدرومەت» ر م ك ۇسىندى، دەپ حابارلايدى Kazinform.

«قازاقستاننىڭ باسىم بولىگىندە قار جامىلعىسى جەلتوقساننىڭ ءبىرىنشى ونكۇندىگىنىڭ سوڭىندا، ال رەسپۋبليكانىڭ وڭتۇستىك-باتىسىندا، وڭتۇستىگىندە جانە وڭتۇستىك-شىعىسىندا ايدىڭ ەكىنشى جارتىسىندا تۇسەدى دەپ بولجانۋدا. جەلتوقسان ايىنىڭ باسىندا قازاقستاننىڭ باسىم بولىگىندە جاۋىن- شاشىن (جاڭبىر، قار) جاۋادى. سونداي- اق تۇمان، كوكتايعاق قۇبىلىستارى بايقالادى دەپ كۇتىلەدى. ال سولتۇستىك وڭىرلەردە ۇيىتقىعان جەل مەن جاياۋ بۇرقاسىن سوعۋى ىقتيمال»، - دەپ اتاپ وتەدى قازگيدرومەتتەن.

مەكەمە مالىمەتىنشە، جەلتوقساننىڭ 5- كۇنىنەن كەيىن وڭتۇستىك ايماقتاردى قوسپاعاندا ەلدىڭ باسىم بولىگىندە ايازدى اۋا رايى كۇتىلەدى. قار جاۋىپ، بۇرقاسىندى جەل كۇشەيەدى. تەرمومەتر باعانى تۇنگى ۋاقىتتا مينۋس 10-20° گرادۋسقا، كۇندىز مينۋس 3-10° گرادۋسقا دەيىن تومەندەيدى دەپ بولجانادى.

كۇز نەگە جىلى بولدى؟

قازاقستان اۋماعىنا ءتان ەمەس جىلى كۇز بەن قىستىڭ كەش كەلۋى باتىس جانە وڭتۇستىك سيكلونداردىڭ ءجيى بولۋىمەن، سونداي- اق يران مەن جەرورتا تەڭىزى اۋداندارىنان جىلى اۋا ماسسالارىنىڭ كەلۋىمەن بايلانىستى. وسىعان وراي قازاقستان اۋماعىنداعى تەمپەراتۋرالىق فون كليماتتىق نورمادان 3-10° گرادۋسقا جوعارى تىركەلدى. مەتەوباقىلاۋ تاريحىندا وسى جىلدىڭ قاراشا ايى وتە جىلى بولدى. جىلى اۋا-رايىنىڭ جوعارعى شەگى 17-18 -قاراشا ارالىعىندا بايقالدى. سوڭعى رەت اۋا رايى جىلى قاراشا ايى 2010 -جىلى تىركەلگەن ەدى. سول كەزدە اۋا تەمپەراتۋراسى نورمادان 2-7° گرادۋسقا اۋىتقىدى.

مۇنداي قۇبىلىس ەل تاريحىندا قاشان بايقالدى؟

كوپجىلدىق باقىلاۋلارعا سايكەس، استانا قالاسىندا قار جامىلعىسىنىڭ ەڭ كەش ءتۇسۋى 1967 -جىلعى 15 -جەلتوقساندا (56 جىل بۇرىن) جانە 2008 -جىلعى 14 -جەلتوقساندا (15 جىل بۇرىن) تىركەلدى.

تاريحي دەرەكتەرگە سۇيەنسەك، ەلوردادا قار جامىلعىسىنىڭ ەرتە ءتۇسۋى – 10- قازان، ورتاشا ءتۇسۋى - 10 -قاراشا، ال كەش ءتۇسۋى 15-جەلتوقساندا بولدى. سوڭعى ءۇش جىلدا – 2020، 2021، 2022 -جىلدارى قاراشانىڭ ءبىرىنشى ونكۇندىگىنىڭ سوڭىندا، ەكىنشى ونكۇندىگىنىڭ باسىندا تۇراقتى قار جامىلعىسى تىركەلىپ، ورتاشا قالىڭدىعى 8-13 س م بولدى.

اۆتور

مارلان جيەمباي