قازاقستان نيدەرلاندتىڭ سۋ تاسقىنىمەن كۇرەس تاجىريبەسىن زەرتتەيدى

استانا. KAZINFORM - قازاقستان مەن نيدەرلاند سۋ تاسقىنىنا قارسى ءىس-قيمىل جانە سالا ماماندارىن دايارلاۋ جونىندە مەموراندۋمدارعا قول قويدى.

قول قويۋ راسىمىنە ق ر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ، ءبىرىنشى ۆيتسە-مينيستر بولات بەكنياز جانە نيدەرلاند مەملەكەتىنىڭ قازاقستانداعى توتەنشە جانە وكىلەتتى ەلشىسى نيكولااس سحەرمەرس قاتىستى.

العاشقى قۇجات - سۋ رەسۋرستارى جانە يرريگاتسيا مينيسترلىگى مەن نيدەرلاند سىرتقى ىستەر مينيسترلىگى اراسىنداعى ءوزارا تۇسىنىستىك تۋرالى مەموراندۋم.

قۇجات سۋ شارۋاشىلىعى قۇرىلىستارىن سالۋ جانە پايدالانۋ، سۋ تاسقىنىن بولجاۋ جانە سۋ تاسقىنىنا قارسى ءىس- شارالاردى جوسپارلاۋ ماسەلەلەرىندە ىنتىماقتاستىقتى كوزدەيدى.

كەلىسىم تاسقىن سۋىن رەتتەۋ مەن پايدالانۋدا تاجىريبە الماسۋ، سونداي-اق وزەن اعىندارىن باسقارۋ بولىگىندە نيدەرلاندتىڭ تاجىريبەسىن زەرتتەۋدى كوزدەيدى.

دەلفت سۋ ءبىلىمى ينستيتۋتىمەن (IHE Delft) قول قويىلعان ەكىنشى مەموراندۋمدا سۋ سالاسىنىڭ ماماندارىن دايارلاۋ، سۋ سالاسىندا عىلىم مەن يننوۆاتسيالىق تەحنولوگيالار سالاسىنداعى ءوزارا ءىس- قيمىل قاراستىرىلعان.

«بۇگىنگى كەزدەسۋ - ءبىزدىڭ نيدەرلاند مەملەكەتىمەن قارىم-قاتىناسىمىزدىڭ ماڭىزدى كەزەڭى. ىنتىماقتاستىعىمىز اۋقىمدى جانە پەرسپەكتيۆالى جوبالاردى ىسكە اسىرۋعا كومەكتەسەتىنىنە، ال تاجىريبە مەن تەحنولوگيا الماسۋ وتاندىق سۋ سالاسىنىڭ الەۋەتىن اشۋعا مۇمكىندىك بەرەتىنىنە سەنىمدىمىن»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

اۆتور

جانات قاپالبايەۆا