قازاقستان مەن سميتسون ورتالىعى مادەني مۇرا سالاسىندا ارىپتەستىكتى كەڭەيتەدى

استانا. KAZINFORM - سميتسون ورتالىعىنىڭ حالىق شىعارماشىلىعى جانە مادەني مۇرا جونىندەگى ارنايى جوبالار ديرەكتورى حاللە باتۆين قازاقستانمەن بىرلەسكەن جوسپارلارىمەن ءبولىستى.

حاللە باتۆيننىڭ ايتۋىنشا، ول مەملەكەت باسشىسى قاسىم-جومارت توقايەۆپەن سميتسون ينستيتۋتىنىڭ جاڭا باستاماسى بولىپ سانالاتىن قازاقستاننىڭ مادەني مۇراسى قورى جونىندە پىكىرلەسكەن.

كەلەسى ايدا امەريكالىق قولونەرشىلەر تاجىريبە الماسۋ اياسىندا الماتىدا وتەتىن حالىقارالىق قولونەر فەستيۆالىنە قاتىسادى. الداعى ۋاقىتتا كورمەلەر ۇيىمداستىرۋ، قازاقستاندىق مۋزىكانتتار مەن ارتىستەردىڭ قاتىسۋىمەن باعدارلامالار وتكىزۋ جوسپارلانعان. بۇل ءىس-شارالار سميتسون ينستيتۋتىنىڭ ازيا ونەرى ۇلتتىق مۋزەيىمەن ارىپتەستىك نەگىزىندە جۇزەگە اسپاق.

سونىمەن قاتار، سميتسون ينستيتۋتى مەن قازاقستان مۋزەي ماماندارى اراسىندا تاجىريبە الماسۋ باعدارلامالارىن ازىرلەۋ كوزدەلىپ وتىر.

- ءبىزدىڭ جۇمىستارىمىزدا ءارتۇرلى ەلەمەنتتەر بار، ءبىز ولاردى زەرتتەپ، قارجىلاندىرۋ ارقىلى قورىمىزدا جۇزەگە اسىرعىمىز كەلەدى، - دەدى حاللە باتۆين.

ونىڭ ايتۋىنشا، اتالعان باستامالاردى ىسكە اسىرۋ ءبىر-ەكى جىلعا سوزىلۋى مۇمكىن، سەبەبى ولار ازىرلەۋ كەزەڭىندە تۇر جانە ۋاقىتتى قاجەت ەتەدى.

سونداي-اق ول سميتسون ورتالىعىنىڭ قازاقستاندىق مۋزىكاعا، ونەر مەن مادەنيەتتىڭ وزگە دە تۇرلەرىنە، مۋزەيلەرمەن ارىپتەستىككە قىزىعۋشىلىعى زور ەكەنىن اتاپ ءوتتى.

- ماعان بۇل قوردىڭ ۇنايتىنى - ول بىزگە شىعارماشىلىق تۇرعىدا جۇمىس ىستەۋگە جانە سميتسون ينستيتۋتىنىڭ ءتۇرلى بولىمدەرىمەن قىزىعۋشىلىعىمىزعا بايلانىستى ارىپتەستىك ورناتۋعا مۇمكىندىك بەرەدى، - دەدى حاللە باتۆين.

ەسكە سالا كەتەيىك، بۇعان دەيىن مەملەكەت باسشىسى قاسىم-جومارت توقايەۆ حاللە باتۆينگە ا ق ش-تا قازاق مادەنيەتىن ىلگەرىلەتۋگە قوسقان بەلسەندى ەڭبەگى ءۇشىن العىس بىلدىرگەن بولاتىن.