قازاقستان مەن قىتايدىڭ ارنايى اكىمشىلىك ايماعى ەلدەرى ءوزارا ۆيزادان بوساتۋ تۋرالى كەلىسىمگە قول قويدى

استانا. KAZINFORM - «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ماكاو ارنايى اكىمشىلىك ايماعىنىڭ ۇكىمەتى اراسىنداعى ەل ازاماتتارىن ۆيزالىق تالاپتاردان بوساتۋ تۋرالى كەلىسىمگە» قول قويۋ ءراسىمى 9-ساۋىردە ماكاو ارنايى اكىمشىلىك ايماعىندا ءوتتى.

بۇل تۋرالى ماكاو ارنايى اكىمشىلىك ايماعىنىڭ (澳門澳门 Àomén, Oumun) ۇكىمەتتىك اقپاراتتىق بيۋروسى ءمالىم ەتتى.

كەلىسىمگە ەكى تاراپتىڭ اتىنان قازاقستاننىڭ قىتايداعى ەلشىسى شاحرات نۇرىشيەۆ پەن قىتايدىڭ ماكاو ارنايى اكىمشىلىك ايماعىنىڭ اكىمشىلىك- قۇقىقتىق جۇمىس دەپارتامەنتىنىڭ باسشىسى جاڭ يۋنچۋن قول قويدى.

جوعارىدا اتالعان كەلىسىم كۇشىنە ەنگەننەن كەيىن قازاقستان رەسپۋبليكاسىنىڭ جارامدى ءتولقۇجاتتارىنىڭ يەلەرى ماكاو ايماعىنا ۆيزاسىز كىرىپ، 14 كۇنگە دەيىن بولا الادى. سونىمەن بىرگە، جارامدى ماكاو ارنايى اكىمشىلىك ايماعىنىڭ پاسپورتتارى بار ماكاو تۇرعىندارى دا قازاقستان رەسپۋبليكاسىنا ۆيزاسىز كىرە الادى جانە 14 كۇنگە دەيىن بولا الادى. ءبىراق، ساپار ماقساتى - تۋريزم نە ترانزيت بولۋى ءتيىس. قازاقستاندىقتار ماكاوعا، ماكاو ازاماتتارى قازاقستانعا وقۋعا، جۇمىس ىستەۋگە نەمەسە سول ەلدە تۇرۋعا ۆيزاسىز بارا المايدى.

قول قويۋ راسىمىنە قازاقستان رەسپۋبليكاسىنىڭ گونكونگتاعى باس كونسۋلى الماس سەيتاقىنوۆ تا قاتىسقان.

2023 -جىلعى 10-قاراشادان باستاپ قازاقستان مەن قىتاي اراسىنداعى شەكتەۋلى ۆيزاسىز رەجيم ەنگىزىلىپ، ونىڭ اياسىندا ازاماتتاردىڭ 30 كۇن مەرزىمگە كورشىلەس ەلگە بارۋىنا رۇقسات بەرىلگەن بولاتىن. الايدا، بۇل رۇقساتتىڭ قىتايدىڭ ارنايى اكىمشىلىك اۋداندارى - گونكونگ پەن ماكاوعا قاتىسى بولماعان.

قازىرگى تاڭدا قازاقستاندىقتار گونكونگقا 14 كۇنگە ۆيزاسىز بارا الادى، ال ماكاوعا بارۋ ءۇشىن ۆيزا قاجەت.

اۆتور

مۇقتار مۇرات