قازاقستان مەن قىتاي كاسىپكەرلەرى قونايەۆ قالاسىندا جاڭا زاۋىت سالادى
استانا. KAZINFORM - قونايەۆ قالاسىندا تامشىلاتىپ سۋارۋ جۇيەلەرىنىڭ قوسالقى بولشەكتەرىن شىعاراتىن زاۋىت اشىلادى.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ قونايەۆ قالاسىنداعى تامشىلاتىپ سۋارۋ جۇيەلەرىنە ارنالعان قوسالقى بولشەكتەر شىعاراتىن زاۋىتتى ارالاپ كوردى. بۇل تۋرالى اتالعان مينيسترلىكتىڭ باسپا ءسوز قىزمەتى مالىمدەدى.
تامشىلاتىپ سۋارۋ ءادىسى -تىرشىلىك ءنارىن تىكەلەي وسىمدىك تامىرىنا جەتكىزۋ ارقىلى سۋدى ۇقىپتى پايدالانۋعا مۇمكىندىك بەرەدى. زاۋىت - قازاقستاندىق جانە قىتاي كاسىپكەرلەرىنىڭ بىرلەسكەن جوباسى. كاسىپورىن قۋاتى اپتاسىنا 500 گەكتارعا دەيىن جەردى تامشىلاتىپ سۋارۋ تەحنولوگياسىمەن قامتاماسىز ەتۋگە جەتەدى دەپ جوسپارلانىپ وتىر.
الداعى ۋاقىتتا تاراز قالاسىندا دا وسىنداي زاۋىت اشۋ جوسپاردا بار. ودان كەيىن، نۇرجان نۇرجىگىتوۆ شەڭگەلدى اۋىلىنداعى №5 سورعى ستانسياسىن ارالادى. نىسان جەكە مەنشىكتە. قازىرگى ۋاقىتتا ونى كەشەندى رەكونسترۋكسيادان وتكىزىپ، مەملەكەتتىك مەنشىككە بەرۋ ماسەلەسى پىسىقتالىپ جاتىر.
مينيستر الماتى وبلىسى رايىمبەك، كەگەن، تالعار، ىلە، جامبىل جانە ۇيعىر اۋداندارى مەن سارىبۇلاق اۋىلىنىڭ سۋارۋ جەلىلەرىن جاڭعىرتۋ بويىنشا تۇزەتىلگەن جوسپارمەن تانىستى.
جوبالاردى ىسكە اسىرۋ مەرزىمى - 8 ايدان 2 جىلعا دەيىن. سونداي-اق مينيستر الماتى وبلىسىنىڭ اكىمدىگى مەن سۋمەن جابدىقتاۋ جانە سۋ ۇنەمدەۋ سالاسىنداعى جەتەكشى قىتايلىق كومپانيالاردىڭ وكىلدەرى اراسىنداعى كەزدەسۋگە قاتىستى. كاسىپكەرلەر باسقا ەلدەردە جۇزەگە اسىرعان جاڭا ازىرلەمەلەرى مەن جوبالارى تۋرالى ايتىپ بەردى.
كەزدەسۋ قورىتىندىسى بويىنشا الماتى وبلىسىنىڭ اكىمدىگى مەن قىتايلىق كومپانيالار اراسىندا وڭىردە سۋ ۇنەمدەۋ تەحنولوگيالارىن ەنگىزۋ بويىنشا مەموراندۋمعا قول قويىلدى. شەتەلدىكتەرمەن كەزدەسۋدەن سوڭ، الماتى وبلىسىنىڭ اكىمى مارات سۇلتانعازيەۆ جانە اۋىل شارۋاشىلىعى ءمينيسترى ايداربەك ساپاروۆتىڭ قاتىسۋىمەن جينالىس ءوتتى. نۇرجان نۇرجىگىتوۆ بايانداما جاساپ، ەل اۋماعىندا سۋدى جيناۋ جانە ونى ۇنەمدەۋ بويىنشا مينيسترلىكتىڭ جۇرگىزىپ جاتقان ءىس-شارالارى تۋرالى ايتىپ بەردى. باياندامالاردان كەيىن ەكى مينيستر دە جەرگىلىكتى شارۋالار مەن كاسىپكەرلەردىڭ سۇراقتارىنا جاۋاپ بەردى.
اۆتور
ەلميرا ورالبايەۆا
