قازاقستان مەن قىرعىزستان ۇنەمى ءبىر-ءبىرىن قولداپ ءجۇرۋى كەرەك - سادىر جاپاروۆ

استانا. KAZINFORM - قىرعىزستان قازاقستانمەن ەكىجاقتى كەلىسىمدەردى تەرەڭدەتۋگە باعىتتالعان ساياساتىن جۇرگىزىپ جاتىر. بۇل تۋرالى اقوردادا جوعارى مەملەكەتارالىق كەڭەستىڭ وتىرىسىندا قىرعىزستان پرەزيدەنتى سادىر جاپاروۆ ايتتى.

«قازاقستان رەسپۋبليكاسىنا رەسمي ساپارمەن كەلۋگە شاقىرعانىڭىز ءۇشىن قاسىم-جومارت كەمەل ۇلىنا ەرەكشە رازىلىعىمدى بىلدىرەمىن. قىرعىز دەلەگاتسياسىنا كورسەتىلىپ جاتقان مەيماندوستىققا جانە كەلىسسوزدى مىقتى دەڭگەيدە ۇيىمداستىرعانى ءۇشىن جالپى قازاقستان جاعىنا العىسىمدى ايتامىن»، - دەدى سادىر جاپاروۆ.

ونىڭ ايتۋىنشا، جوعارى مەملەكەتارالىق كەڭەستىڭ وتىرىسى ەكى ەل اراسىنداعى بايلانىستاردى جاڭا ساپالى دەڭگەيگە كوتەرەدى، سونداي-اق قازاق-قىرعىز ىنتىماقتاستىعىنىڭ دامۋىنا ىقپال ەتەدى.

سونىمەن قاتار قىرعىزستان پرەزيدەنتى بۇگىنگى كەلىسسوزدەر ستراتەگيالىق سەرىكتەستىك رۋحىندا ءوتىپ جاتقانىن اتاپ ءوتتى.

«قىرعىزستان قازاقستانمەن ەكىجاقتى كەلىسىمدەردى تەرەڭدەتۋگە باعىتتالعان ساياساتىن جۇرگىزىپ جاتىر. ءبىزدىڭ ەلدەر اراسىندا ەشقانداي ساياسي قاراما- قايشىلىق جوق. وسى ورايدا ءبىر-ءبىرىمىزدى قولداپ، كەلەشەكتى ويلاپ، ءتيىستى ماسەلەلەردى بىرلەسە شەشۋ ماڭىزدى دەپ ويلايمىن. بۇرىننان ەلدەرىمىز ىنتىماقتا، دوستىق قارىم- قاتىناستا بولىپ، ءبىرتۋعان رەتىندە ءبىر-بىرىنە جاردەم بەرىپ، قولداۋ جاساپ كەلەدى»، - دەدى س. جاپاروۆ.

بۇدان بۇرىن حابارلانعانداي، بۇگىن مەملەكەت باسشىسى قاسىم-جومارت توقايەۆ قازاقستانعا رەسمي ساپارمەن كەلگەن قىرعىزستان پرەزيدەنتى سادىر جاپاروۆتى اقوردادا كۇتىپ الدى.

قازاقستان پرەزيدەنتىنىڭ ايتۋىنشا، سادىر جاپاروۆتىڭ استاناعا ساپارى اياسىندا تاريحي كەلىسىمگە قول قويىلادى.

مەملەكەت باسشىسى جوعارى مەملەكەتارالىق كەڭەس قازاق-قىرعىز قارىم-قاتىناستارىنا ەرەكشە سەرپىن بەرەتىنىن ايتتى.

اۆتور

رۋسلان عابباسوۆ