قازاقستان مەن فرانسيا كينەماتوگرافيا سالاسىندا ىنتىماقتاستىقتى نىعايتادى
استانا. KAZINFORM - قازاقستانداعى ۇلتتىق كينونى قولداۋ ورتالىعى مەن فرانسيانىڭ ۇلتتىق كينەماتوگرافيا جانە انيماتسيا ورتالىعى حالىقارالىق كانن فەستيۆالى اياسىندا ىنتىماقتاستىق تۋرالى مەموراندۋمعا قول قويدى. بۇل تۋرالى ق ر مادەنيەت جانە اقپارات مينيسترلىگى ءمالىم ەتتى.

ماڭىزدى قادام قوس ەل اراسىنداعى مادەني قارىم-قاتىناستى نىعايتىپ، كينويندۋستريا سالاسىن دامىتۋعا باعىتتالعان.
مەموراندۋم اياسىندا تاراپتار ەكى ەلدىڭ كينو ونىمدەرىن ءوز اۋماقتارىندا تاراتۋعا قولداۋ كورسەتەدى.
«كينو ونىمدەرىن شەتەلدە تاراتۋ - مادەني ءارالۋاندىقتى ىلگەرىلەتۋدىڭ ماڭىزدى فاكتورى. بۇل ورايدا فرانسياداعى ۇلتتىق كينەماتوگرافيا جانە انيماتسيا ورتالىعى قازاقستاندىق ارىپتەستەرگە كينو ءوندىرىسىن حالىقارالىق دەڭگەيدە ىلگەرىلەتۋگە قاتىستى ساراپتامالارىن بولىسەدى. بۇل - تاجىريبە تولىستىرۋعا تاپتىرماس مۇمكىندىك»، - دەيدى قازاقستانداعى ۇلتتىق كينونى قولداۋ ورتالىعىنىڭ باسقارما ءتوراعاسى قۇرمانبەك جۇماعالي.
فرانسيا ۇلتتىق كينەماتوگرافيا جانە انيماتسيا ورتالىعى قازاق فيلمدەرىن تاراتۋعا، فرانسۋز فيلمدەرىن قازاق تىلىنە دۋبلياجداۋعا كومەك كورسەتۋگە دايىن ەكەنىن جەتكىزدى.
اۆتور
باقىتگۇل اباي قىزى