قازاقستان مەن فرانسيا بالقاش كولى باسسەينىنە اۋقىمدى زەرتتەۋ جۇرگىزۋ مۇمكىندىگىن قاراستىرىپ جاتىر
استانا. KAZINFORM - سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز فرانسيالىق دەلەگاتسيامەن كەزدەسىپ، بالقاش كولىن بىرلەسىپ زەرتتەۋ مەن جەراستى سۋلارىن باسقارۋ سالاسىنداعى ىنتىماقتاستىق مۇمكىندىكتەرىن تالقىلادى، دەپ حابارلايدى مينيسترلىكتىڭ باسپا ءسوز قىزمەتى.
ەڭ الدىمەن فرانسيانىڭ گەولوگيالىق جانە تاۋ- كەن زەرتتەۋلەرى بيۋروسىنىڭ (BRGM) ساراپشىلارى مەن قازاقستاندىق ماماندار اراسىنداعى ىنتىماقتاستىق تۋرالى ءسوز بولدى. جوبا وتكەن جىلى ىسكە قوسىلدى جانە بۇگىنگى كۇنگە دەيىن فرانسۋز ساراپشىلارىنىڭ قاتىسۋىمەن قازاقستاندا جەراستى سۋ رەسۋرستارىن باسقارۋداعى ەڭ وزەكتى ماسەلەلەردى انىقتاۋ ماقساتىندا 8 سەمينار ءوتتى.
بولات بەكنياز مينيسترلىك كۇن تارتىبىندەگى بارلىق ماسەلەلەردى مۇقيات زەردەلەپ، باسىم باعىتتاردى انىقتايتىنىن ايتتى. وسىدان كەيىن فرانسۋز ساراپشىلارى ولاردى شەشۋ ادىستەرىن ايقىندايتىن تۇجىرىمدامالىق قۇجات جاسايدى.
سونداي-اق، فرانسيادان كەلگەن قوناقتار بالقاش كولى باسسەينىنە اۋقىمدى زەرتتەۋ جۇرگىزۋ جانە ونىڭ سۋ رەسۋرستارىن باسقارۋ مودەلىن جاساۋ تۋرالى باستاما كوتەردى. بۇل جۇمىس جەرسەرىكتىك سۋرەتتەردى زەرتتەۋدى جانە گيدروگەولوگيالىق تالداۋدى قامتيدى. جوبا ىسكە اسىرىلعان جاعدايدا زەرتتەۋلەرگە فرانسۋز دامۋ اگەنتتىگىن تارتۋ جوسپارلانىپ وتىر.
«ۇسىنىس وتە قىزىق. وزدەرىڭىز بىلەتىندەي، ارال مەن كاسپيدى زەرتتەۋ جانە ساقتاۋ ماسەلەلەرىمەن اينالىساتىن ۇيىمدار بار. ءبىراق، كول باسسەينىن اۋقىمدى زەرتتەۋ قاجەت بولعانىمەن، بالقاش بويىنشا جەكەلەگەن ينستيتۋتتار نەمەسە قورلار جوق. ءبىز وسى باعىتتا بىرلەسىپ جۇمىس ىستەۋگە دايىنبىز. سونداي-اق، وسى مۇمكىندىكتى پايدالانا وتىرىپ، فرانسۋز دەلەگاتسياسىن مامىر ايىنىڭ سوڭىندا وتەتىن «بالقاش-2024» حالىقارالىق سۋ-كليماتتىق فورۋمىنا شاقىرامىن»، - دەدى سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز.
بالقاش كولىن زەرتتەۋمەن قاتار، تاراپتار قازاقستاننىڭ باتىسىنداعى جەراستى سۋلارىنىڭ كەن ورىندارىنىڭ مۇنايمەن لاستانۋ تۇرعىسىنان زەرتتەۋ بويىنشا ىنتىماقتاستىق مۇمكىندىكتەرىن تالقىلادى.
