قازاقستان مەن ازەربايجاندى ورتاق تاريح پەن رۋحاني قۇندىلىقتار بايلانىستىرادى - مۇرات نۇرتىلەۋ
استانا. KAZINFORM - بيىل قازاقستان مەن ازەربايجان اراسىنداعى ستراتەگيالىق ارىپتەستىك پەن وداقتاستىق قاتىناستار تۋرالى شارتقا 20 جىل.
- بۇگىنگى باسقوسۋ مەملەكەتتەرىمىزدىڭ كوپ جىلعى جەمىستى ىقپالداستىعىن جاڭا ءارى ساپالى دەڭگەيگە كوتەرۋدىڭ جانە قول جەتكىزىلگەن ۋاعدالاستىقتى جۇزەگە اسىرۋ جولدارىن سارالاپ الۋدىڭ ورايلى ءساتى دەپ سانايمىز. قازاقستان مەن ازەربايجان - قارت كاسپيدىڭ قوس جاعالاۋىنا ەجەلدەن قونىس تەپكەن باۋىرلاس ەلدەر. ءبىزدى ءتۇبى ءبىر تۇركىتىلدەس حالىقتار رەتىندە ورتاق تاريح، ءوزارا جاقىن مادەنيەت جانە تامىرلاس رۋحاني قۇندىلىقتار بايلانىستىرادى، - دەدى ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ ب ا ق وكىلدەرى الدىندا مالىمدەمە جاساي تۇرىپ.
ءمينيستردىڭ ايتۋىنشا، قازاق-ازەربايجان قارىم-قاتىناسى كونسترۋكتيۆتى ساياسي ديالوگتىڭ ارقاسىندا قارقىندى دامىپ كەلەدى.
- مەملەكەت باسشىلارىمىز قاسىم-جومارت توقايەۆتىڭ جانە يلحام اليەۆتىڭ سوڭعى ءۇش جىلدا ءوزارا توعىز رەت جاساعان مەملەكەتتىك جانە رەسمي ساپارلارىنىڭ ناتيجەسى ەكىجاقتى ىنتىماقتاستىقتى جانداندىرۋدىڭ تىڭ باعىتتارىن ايقىندادى. وسى كەزەڭدە ستراتەگيالىق ارىپتەستىكتى نىعايتۋ جانە وداقتاستىق ءوزارا ءىس-قيمىلدى تەرەڭدەتۋ تۋرالى بىرلەسكەن دەكلاراتسيانىڭ قابىلدانۋى جانە جوعارى مەملەكەتارالىق كەڭەستىڭ قۇرىلۋى ەلدەرىمىزدىڭ ەتەنە بايلانىسىن جاڭا دەڭگەيگە كوتەردى. ەكى ەل پرەمەر-مينيسترلەرىنىڭ ءوزارا ساپارلارى ۇكىمەتارالىق بايلانىستاردى نىعايتۋعا ەلەۋلى ىقپال ەتتى. كەزدەسۋدە پارلامەنتارالىق ىقپالداستىقتى، ونىڭ ىشىندە دوستىق توبىنىڭ قارىم-قاتىناسىن ودان ءارى كەڭەيتۋ مۇددەسى دە تولىق قۋاتتالدى. ءبىز ءبىرقاتار كوپجاقتى فورمات اياسىندا ءوزارا قولداۋ كورسەتۋگە دايىن ەكەنىمىزدى بىلدىردىك، - دەيدى ۆەدومستۆو باسشىسى.
ايتا كەتەيىك، بۇگىن ەلورداعا ازەربايجان رەسپۋبليكاسىنىڭ سىرتقى ىستەر ءمينيسترى دجەيحۋن بايراموۆ رەسمي ساپارمەن كەلدى.
ساپار اياسىندا ازەربايجاندىق مينيستر قازاقستان رەسپۋبليكاسى پرەمەر-ءمينيسترىنىڭ ورىنباسارى -سىرتقى ىستەر ءمينيسترى مۇرات نۇرتىلەۋمەن شاعىن جانە كەڭەيتىلگەن قۇرامدا كەلىسسوز وتكىزدى.
كەزدەسۋ بارىسىندا بەلگىلى بولعانداي، ترانسكاسي حالىقارالىق ءدالىزى ارقىلى جۇك تاسىمالى 10 ميلليون تونناعا ارتادى.
سونداي-اق قازاقستان «باكۋ- تبيليسي- دجەيحان» قۇبىرى ارقىلى مۇناي تاسىمالىن 2,2 ميلليون تونناعا ۇلعايتپاق.
اۆتور
داۋلەت ىزتىلەۋ
