قازاقستان كيىكتەردى جازدا كوشىرۋ ءۇشىن رەسەيمەن كەلىسسوز جۇرگىزىپ جاتىر
استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ ەلدەگى ەگىن اۋماقتارىن كيىكتەردەن قورعاۋ ءۇشىن قانداي شارالار جۇرگىزىلەتىنىن ايتىپ بەردى.
- كيىك پوپۋلياتسياسى 2003 -جىلى 21 مىڭ عانا بولسا، بيىل - 2 ميلليون 833 مىڭعا دەيىن ءوستى، ال كوكتەمگى تولدەن كەيىنگى سانى شامامەن 4 ميلليونعا دەيىن كوبەيەدى. قازىرگى تاڭدا الەمدىك پوپۋلياتسياسىنىڭ 99 پروتسەنتى قازاقستاندا مەكەندەيدى، - دەدى مينيستر ۇكىمەت ۇيىندە وتكەن باسپا ءسوز ءماسليحاتىندا.
حالىقارالىق تابيعاتتى قورعاۋ وداعى قىزىل كىتاپتا كيىكتىڭ تابيعي قورعاۋ مارتەبەسىن ءۇش ساناتقا جوعارى كوتەرىپ، «جويىلۋ قاۋپى ءتونىپ تۇرعان» ساناتىنان «قاۋىپ ءتونۋ شەگىنە جاقىن» ساناتىنا اۋىستىردى.
- ءبىز كيىكتى قورعاۋ جۇمىستارىن ءالى دە جالعاستىرامىز. وعان قوسا، اۋىل شارۋاشىلىعى جەرلەرىنىڭ قورعالۋىن كۇشەيتۋ شارالارىن جوسپارلاپ وتىرمىز. ول ءۇشىن قوسىمشا 112 جۇمىس ورنىن اشامىز. اقبوكەندەردىڭ تارالۋ اۋماعى كەڭەيدى، ال ينسپەكتورلىق قۇرام جەتكىلىكسىز. اسىرەسە، بۇل جاعداي باتىس قازاقستان پوپۋلياتسياسىنا قاتىستى. تاريحي تۇرعىدان العاندا، باتىس قازاقستان پوپۋلياتسياسىنىڭ ەڭ كوپ سانى 298 مىڭ بولاتىن. ال قازىر تولدەۋ كەزەڭىنەن كەيىن بۇل كورسەتكىش 2 ميلليوننان استى. سوندىقتان، ءبىز بۇل ماسەلەنى اۋىل شارۋاشىلىعى جەرلەرىن قورعاۋدى كۇشەيتۋ ارقىلى شەشۋدەمىز، - دەيدى مينيستر.
سونىمەن قاتار، باتىس قازاقستان پوپۋلياتسياسى نەمەسە ەدىل-جايىق پوپۋلياتسياسى جاز ايلارىندا رەسەي فەدەراتسياسىنىڭ اۋماعىنا كوشىپ وتىراتىن.
- مۇنى ەكى ەلدىڭ عالىمدارى دا راستايدى. وسىعان بايلانىستى ءبىز اقبوكەندەردىڭ جاز مەزگىلىندە تاريحي مەكەندەرىنە ەركىن ءوتۋىن قامتاماسىز ەتۋ ءۇشىن كەلىسسوزدەر جۇرگىزىپ جاتىرمىز. بۇل اۋىل شارۋاشىلىعى ونىمدەرىن وندىرۋشىلەرگە تۇسەتىن جۇكتەمەنى دە ازايتۋعا كومەكتەسۋى مۇمكىن، - دەيدى ەكولوگيا ءمينيسترى.
ايجان سەرىكجان قىزى
اۆتور
