قازاقستان فۋتبول فەدەراتسياسى چەرچەسوۆتىڭ وتستاۆكاعا كەتۋى جونىندە مالىمدەمە جاسادى
استانا. KAZINFORM - قازاقستان فۋتبول فەدەراتسياسى تەك رەسمي اقپارات كوزدەرىنە سەنۋگە شاقىردى.
- فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ قىزمەتىنەن كەتۋى تۋرالى كەيبىر بۇقارالىق اقپارات قۇرالدارىندا جاريالانعان اقپارات شىندىققا جاناسپايدى. قازىرگى تاڭدا ستانيسلاۆ چەرچەسوۆ ۇلتتىق قۇرامانىڭ باس باپكەرى قىزمەتىن جالعاستىرىپ، قازاقستان فۋتبول فەدەراتسياسىمەن كەلىسىمشارت بويىنشا جۇمىس ىستەيدى، - دەلىنگەن حابارلامادا.
قازاقستان فۋتبول فەدەراتسياسىنىڭ باسپا ءسوز قىزمەتى تەك رەسمي اقپارات كوزىنە، فەدەراتسيانىڭ رەسمي سايتى مەن الەۋمەتتىك جەلىلەرىندە جاريالانعان اقپاراتقا سەنۋگە شاقىرادى.
ەسكە سالا كەتەيىك، بۇعان دەيىن ستانيسلاۆ چەرچەسوۆ ايىپپۇل تولەيتىن بولعانىن جازعان ەدىك. سەبەبى ەل قۇراماسىنىڭ ۇلتتار ليگاسى اياسىندا ءوز الاڭىمىزدا وتكەن سلوۆەنيامەن كەزدەسۋىنەن كەيىن وعان پ س ج جەيدەسىن كيگەن جۋرناليست قازاق تىلىندە ساۋال قويعان ەدى. باس باپكەر سۇراق قويعان جۋرناليستكە «فرانتسۋز تىلىندە سۇراق قويىپ تۇرسىڭ با؟» دەپ ايتقان بولاتىن.
بۇل جاعداي الەۋمەتتىك جەلىدە كوپشىلىك اراسىندا تالقىلاندى. باس باپكەردىڭ بۇل ورەسكەل ارەكەتى ءۇشىن قازاقستان فۋتبول فەدەراتسياسى تاراپىنان ايىپپۇل سالىندى. ايىپپۇل كولەمى – 200 ايلىق ەسەپتىك كورسەتكىش (738400 تەڭگە).
ارتىنشا ق ف ف ستانيسلاۆ چەرچەسوۆ قازاق ءتىلى مەن ەلىمىزدىڭ مادەنيەتىنە ۇلكەن قۇرمەتپەن قارايتىنىن مالىمدەگەن بولاتىن.
وسى تۇستا دەپۋتاتتار شۋلاپ، «ءتىلىمىزدى تاپتاعان چەرچەسوۆكە قاقپامىزعا كىرگەن ءار گول ءۇشىن 80 ميلليون تەڭگە تولەپ وتىرمىز»، - دەپ رەنجىگەن ەدى.
