قازاقستان شەتەلگە كوفە ساتادى
استانا. قازاقپارات - كوفە تاڭسىق اس بولماي قالدى. ۇيدە دە، تۇزدە دە كەز كەلگەن جەردە قولجەتىمدى. جۇرتتىڭ وسى قوڭىر سۋسىنعا بوي ۇيرەتكەنى سونشا جاياۋلاپ تا، كولىكتە كەلە جاتىپ تا ىشەدى.
قاي بۇرىشقا بۇرىلساڭىز دا الدىڭىزدان «مەنمۇندالاپ» كوفە شىعادى. ەڭ باستىسى، بۇرىن كوفەنى وزگە ەلدەردەن يمپورتتاپ كەلسەك، ەندى ءوزىمىز ەكسپورتتاۋعا كوشتىك. ۇيقىمىزدان ويانۋ ءۇشىن كوفە، تۇسكى ۇزىلىستە دە كوفە، ۇيگە قايتار جولدا دا كوفە الا كەتەتىنىمىز بار. دوسىمىزبەن دە جايلى كوفەحانادا كەزدەسكەندى ءجون كورەمىز. قالاي دەسەك تە، كوفە قالالىقتاردىڭ ومىرىنە دەندەپ ەنىپ كەتتى.
ايبەك احانوۆ، كوفە فەستيۆالدەرىن ۇيىمداستىرۋشى:
- بۇكىل الەمدە كوفە تۇتىنۋشىلاردىڭ سانى ءوسىپ، كوفە بيزنەسىنىڭ ووكەندەۋ تەندەنتسياسى بايقالادى. مىسالى، قازاقستاندا بۇل كاسىپ جىل سايىن 20 پايىزعا ءوسىپ جاتىر. سوعان سايكەس حالىقتىڭ تۇتىنۋ كورسەتكىشى دە جوعارىلاۋدا. بۇل سۋسىنعا جۇرت تولىق ۇيرەندى دەسەك بولادى.
دەسەك تە، كوفەنى ءىشۋ ءتارتىبى مەن مولشەرىن ءبىلىپ، كەرى اسەر ەتۋىنە جول بەرمەيىك دەيدى ماماندار.
فاريزا سەمبايەۆا، نۋتريتسيولوگ:
- كوفەنى نەگىزى تاڭەرتەڭگى ۋاقىتتا 9.30-11.30-دىڭ اراسىندا ءىشۋ كەرەك. تەك اشقارىنعا ىشۋگە بولمايدى. مىندەتتى تۇردە تاڭعى اسپەن. قان قىسىمى جوعارى كىسىلەرگە، جۇكتى ايەلدەرگە، 14 جاسقا دەيىنگى باللارعا مۇلدە قولدانۋعا بولمايدى.
ەلوردادا قازىر 692 كوفەحانا جۇمىس ىستەپ تۇر. ال ءساۋىر ايىندا ەكى گيس قوسىمشاسىنان بۇل ورىنداردى ىزدەۋشىلەردىڭ سانى 415 مىڭنان اسقان. اي سايىن بۇل كورسەتكىش كوبەيمەسە، ازايمايتىن سىڭايلى. سوندىقتان بولار ەلىمىزدە كوفە يمپورتى دا ءوسىپتى.
گرافيكا: دالىرەك ايتساق، 2023 -جىلى قازاقستان باسقا ەلدەردەن 3100 توننا كوفە ساتىپ الدى. ءبىرىنشى ورىندا رەسەي - 1100 توننا، ەكىنشى ورىندا برازيليا - 823 توننا، ودان كەيىن يتاليا - 426 توننا، نيدەرلاندى - 122 توننا، گەرمانيا - 88، كولۋمبيا - 60، ەفيوپيا - 58 توننا.
بۇل 2022 -جىلمەن سالىستىرعاندا 5,5 پايىزعا ارتىق كورسەتكىش. ءتىپتى شيكىزاتتى ساتىپ الىپ، ءوز ەلىمىزدە وندىرەتىن شاعىن زاۋىتتار دا جۇمىس ىستەيدى. سونداي ءوندىرىستىڭ ءبىرى ەڭ العاش رەت 2009 -جىلى قاراعاندى قالاسىندا اشىلىپتى.
پاۆەل سەريكوۆ، كوفە وندىرەتىن كومپانيا ديرەكتورى:
- كوفە ەكۆاتورلىق ايماقتاردا وسەتىندىكتەن ءبىز شيكىزاتتى ەۋروپالىق يمپورتتاۋشىلاردان ساتىپ الىپ، دايىن ونىمگە اينالدىرىپ، كوفكحانالار، مەيرامحانالار، ءتىپتى جەكە ادامدارعا جەتكىزەمىز. ءبىز قازاقستانداعى العاشقى وندىرۋشىلەرمىز. قاراعاندىدا شىعارامىز. سوڭعى 5-6 جىلدا قاتارىمىز كوبەيىپ كەتتى. ءتۇرلى قالادا، ورتالىق قانا ەمەس، وڭىرلەردە دە بار.
ال سوڭعى جىلدارى قازاقستان تەك كوفە يمپورتتاۋشى ەمەس، از كولەمدە بولسا دا رەسەي، قىرعىزستان، وزبەكستان، ازەربايجان، موڭعوليا سەكىلدى ەلدەرگە ەكسپورتتاۋشى ەلگە دە اينالعان. مىسالى، 2023 -جىلى قازاقستاننان جالپى قۇنى 829 مىڭ دوللارعا 70 توننا كوفە ساتىلدى.
