قازاقستان ءوزىن نەگىزگى ازىق-تۇلىكپەن تولىق قامتۋى كەرەك - پرەمەر-مينيستر

استانا. KAZINFORM - پرەمەر- مينيستر ولجاس بەكتەنوۆ اۋىل شارۋاشىلىعى ونىمدەرىن ارتتىرۋ بويىنشا ۇكىمەت وتىرىسىن وتكىزدى.

ونىڭ ايتۋىنشا، 2024-2028 -جىلدارعا ارنالعان جول كارتاسىندا جالپى ءونىم كولەمىن 2 ەسەگە ارتتىرۋ كوزدەلگەن. بيىل بۇل جوسپار %111- دى قۇرايدى.

«6 ايدىڭ قورىتىندىسى بويىنشا ءوسىم %103- دى كورسەتتى. دەگەنمەن، وسىمدىك شارۋاشىلىعىنىڭ تيىمدىلىگىن كۇزدە كورەمىز. سالانى دامىتۋ ءۇشىن بارلىق قاجەتتى جاعداي جاسالدى. قازاقستان ءوزىن نەگىزگى ازىق-تۇلىك ونىمدەرىمەن تولىق قامتاماسىز ەتە وتىرىپ، ەكسپورتتى دا دامىتۋ كەرەك. ۇكىمەت وسىعان قاجەتتى بارلىق رەسۋرستاردى بولەدى. اۋىل شارۋاشىلىعىن دامىتۋ - مەنىڭ جەكە باقىلاۋىمدا تۇراتىن باسىم باعىت»، - دەدى و. بەكتەنوۆ بۇگىنگى ۇكىمەت وتىرىسىندا.

بيىل كوكتەمگى ەگىس جۇمىستارى مەن اۋىل شارۋاشىلىعى تەحنيكالارىنىڭ ليزينگىنە اۋقىمدى قاراجات باعىتتالدى. جەڭىل شارتتارمەن نەسيە بەرۋ كولەمى ءبىرىنشى رەت 580 ميلليارد تەڭگەگە جەتكىزىلدى. بۇعان دەيىن بۇل كورسەتكىش 180 ميلليارد تەڭگەدەن اسىپ كورمەگەن.

«بۇل ەگىنشىلەردىڭ بارلىق قاجەتتى اگروتەحنيكالىق ءىس-شارالاردى تولىق كولەمدە جۇرگىزۋىنە مۇمكىندىك بەردى. مۇندا قارجىلاندىرۋ كوزدەرى، ونىڭ ىشىندە الەۋمەتتىك- كاسىپكەرلىك كورپوراتسيالاردى تارتۋ ەسەبىنەن بارىنشا كەڭەيتىلدى. قارجى ينستيتۋتتارىن تىكەلەي سۋبسيديالاۋ جانە اگروونەركاسىپ كەشەن سۋبەكتىلەرىنىڭ قارىزدارىن كەپىلدەندىرۋ تەتىكتەرى ەنگىزىلدى»، - دەدى ۇكىمەت باسشىسى.

پرەمەر جول كارتاسىنىڭ ينديكاتورلارىنا قول جەتكىزۋ بويىنشا شارا قابىلداۋدى تاپسىردى. مينەرالدى تىڭايتقىشتاردى قولدانۋ دەڭگەيىن جىل سايىن 1,5 ميلليون تونناعا دەيىن جەتكىزۋ قاجەت.

«ءوڭىر اكىمدىكتەرى ەگىن وراعى باستالعانشا استىق قابىلداۋ كاسىپورىندارىنىڭ جاڭا ءونىم قابىلداۋعا تولىق دايىندىعىن قامتاماسىز ەتسىن. ەگىن جيناۋ كەزەڭىندە استىق قابىلداۋ كاسىپورىندارى ۇزدىكسىز جۇمىس ىستەۋگە ءتيىس. ءوڭىر اكىمدىكتەرى جەڭىلدىكتى قارجىلاندىرۋدىڭ، ونىڭ ىشىندە الەۋمەتتىك- كاسىپكەرلىك كورپوراتسيالار بەرەتىن قارجىلاندىرۋدىڭ ديقاندارعا %100 جەتكىزىلۋىن قامتاماسىز ەتسىن»، - دەيدى و. بەكتەنوۆ.

اۆتور

ايجان سەرىكجان قىزى