قازاقستان ءداستۇرلى ساداق اتۋدان ءبىر التىن، ەكى قولا جەڭىپ الدى
استانا. KAZINFORM - دۇنيەجۇزىلىك كوشپەندىلەر ويىندارىندا ءداستۇرلى ساداق اتۋدان پۋتا نىساناسىن كوزدەۋ بويىنشا جارىس اياقتالدى. وندا قازاقستاندىق سپورتشىلار ءبىر التىن، ەكى قولا مەدالىن جەڭىپ الدى.
بۇگىن «پۋتا» نىساناسى بويىنشا (ەرلەر - 70 مەتر، ايەلدەر - 60 مەتر) جارىس ءوتتى. «ارعىماق» ات- سپورت كەشەنىندە ءوتىپ جاتقان باسەكەگە 33 مەملەكەتتەن 180 سپورتشى قاتىسقان ەدى. بۇل سپورت تۇرىنەن قازاقستان قۇراماسىندا 10 سپورتشى ەل نامىسىن قورعادى.
اقتىق سايىستا قازاقستاندىق جانىبەك قۇلمىرزايەۆ پەن ماجارستاندىق لاسلو كوچكا تەڭ ءتۇستى. ويىن ەرەجەسى بويىنشا ولار تاعى 9 جەبە اتتى جانە قازاقستاندىق سپورتشى 7:6 ەسەبىمەن باسىم ءتۇستى.
فينال ناتيجەسىندە ەرلەر اراسىندا قازاقستاندىق جانىبەك قۇلمىرزايەۆ التىن مەدال، ماجارستاندىق لاسلو كوچكا - كۇمىس جانە قازاقستاندىق قانات قاسىمحان پەن قىرعىزستاندىق يسحاك توكونوۆ - قولا مەدال جەڭىپ الدى.
ايەلدەر اراسىندا التىن جۇلدە رەسەيلىك اننا الەكسەيەۆاعا بەرىلدى، قىرعىزستاندىق اسەل سادىروۆا - كۇمىس، قازاقستاندىق ايكوركەم باتيحان مەن ماجارستاندىق كورەني يانكا يۋديت - قولا جۇلدە الدى.
ەرتەڭ 10-قىركۇيەكتە «ارعىماق» ات-سپورت كەشەنىندە قالقان نىساناسى بويىنشا كەزەكتى جارىس وتەدى. وندا ەرلەر 60 مەتر، ايەلدەر 50 مەتر قاشىقتىقتا نىسانا كوزدەيدى.
ودان كەيىنگى كۇندەرى جامبى نىساناسى - 30 مەتر جانە كوماندالىق جارىس (30 مەتر) وتەدى.
اۆتور
ايجان سەرىكجان قىزى
