قازاقستان بيىل ۇزدىك تۋريستىك باعىتتار تىزىمىندە 119 ەلدىڭ ىشىندە 52 ورىنعا تۇراقتادى
استانا. KAZINFORM - قازاقستان ساياحات جانە تۋريزمدى دامىتۋ جونىندەگى دۇنيەجۇزىلىك ەكونوميكالىق فورۋمنىڭ يندەكسىنە سايكەس، ۇزدىك تۋريستىك باعىتتار تىزىمىندە 119-دان 52- ورىندى يەلەندى.

بۇل تۋرالى ورتالىق كوممۋنيكاتسيالار قىزمەتى الاڭىندا وتكەن باسپا ءسوز كونفەرەنسياسىندا ق ر تۋريزم جانە سپورت مينيسترلىگى تۋريزم يندۋسترياسى كوميتەتىنىڭ ءتوراعاسى نۇرتاس كارىپبايەۆ مالىمدەدى.
ونىڭ سوزىنشە، 2 جىل بۇرىن ەلىمىز 117 ەلدىڭ ىشىندە 66- ورىندا بولعان. بولاشاقتا وسى رەيتينگتەگى ۇزدىك 50 ەلدىڭ قاتارىنا كىرۋ مىندەتى تۇر.
وتكەن جىلدىڭ قورىتىندىسى بويىنشا تۋريزم سالاسى پاندەميادان كەيىن تولىق قالپىنا كەلىپ قانا قويماي، تۋريزمنىڭ نەگىزگى كورسەتكىشتەرى بويىنشا ەڭ جوعارى دەڭگەيگە جەتكەن. 2023 -جىلى ەلگە 9,2 ميلليون شەتەلدىك كەلگەن. 2022 -جىلعى ستاتيستيكادان 2 ەسە كوپ. 9,6 ميلليوننان استام وتانداس ەل ىشىندە ساياحاتتادى، ياعني 2022 -جىلدان 1 ميلليونعا ارتىق. تۋريزم نىساندارى 229 ميللياردتان استام تەڭگەگە قىزمەت كورسەتتى، بۇل 2022 -جىلعى كورسەتكىشتەن 1,3 ەسە كوپ.
«باعانىڭ باسەكەگە قابىلەتتىلىگىن، قىزمەت كورسەتۋ ساپاسىن جانە الەۋمەتتىك-ەكونوميكالىق ىقپالدى قوسا العاندا، ءتۇرلى كريتەري بويىنشا رەيتينگتى جاقسارتۋ ءبىزدىڭ دۇرىس باعىتتا كەلە جاتقانىمىزدى كورسەتەدى. ەكىنشى جاعىنان، بۇل - ورتالىق مەملەكەتتىك ورگاندار، اكىمدىكتەر، قاۋىمداستىقتار، بيزنەس جانە ارالاس سالالاردىڭ ۇيلەسىمدى جۇمىسىنىڭ كورسەتكىشى»، - دەدى سپيكەر.